地址 | Japan, 〒455-8605 Aichi-ken, Nagoya-shi, Minato-ku, Kinjōfutō, 2丁目2−1 |
電話 | 050-5840-0505 |
費用 | 詳見內文 |
網址 | http://www.legoland.jp/ |
日期 | 全年適用 |
時間 | 平日: 10:00-17:00 ; 假日: 10:00-18:00或19:00 |
LEGOLAND出名為家庭而設,4月1號正式開幕的名古屋LEGOLAND 唔例外。樂園分7大區域,有超過40個遊樂設施同表演。玩唔完嘅遊戲固然吸引小朋友,但相信去到樂園中間嘅Miniland,大人一樣歎為觀止。大家可以一次過欣賞多個由LEGO砌出嘅日本城市地標,可以用壯觀嚟形容!LEGO仲有便利家庭的小安排,而且交通都好方便,立即一次過話俾大家知。
(原圖:LEGOLAND® Japan)
LEGOLAND® Japan係亞洲第二、全球第八個開幕嘅LEGOLAND。雖然面積不大,但絕對有睇頭,亦夠一家大細玩盡一天;園內使用咗超過1千7百萬塊LEGO,超過1萬個LEGO模型散落7大區域,度度都可以係影相位。
▲入場後即刻可以見到佢
▲LEGO City最貼近日常生活
▲細心留意仲有好多小驚喜
位於LEGOLAND的大門口,係出入必經之地,呢一區除咗可以睇到LEGO嘅製作過程,入面嘅Big Shop更加係全亞洲擁有最多LEGO產品的店舖,必逛呀,稍後再同大家一一介紹必買商品!
▲必逛的商店
▲唔只俾大家睇到LEGO製作過程,仲可以帶返屋企,自然大排長龍!
呢個區域係全球首次亮相,同馬來西亞LEGOLAND嘅Imagination(幻想樂園)性質有少少似,都係充滿童趣。例如馬來西亞有嘅「孩子力量塔」,喺名古屋呢度就以「貓捉老鼠」嘅主題呈現,一樣要求大小朋友合力拉繩登上塔頂,好玩得嚟又唔太驚,小朋友實鍾意。
▲貓捉老鼠,130cm以下小童要由16歲或以上成人陪同先玩得;身高唔夠105cm就唔玩得喇。
作為主題樂園,旋轉木馬同咖啡杯少不了,但千祈唔好嫌老土miss咗呀!呢度嘅旋轉木馬Brick Party以大大嚿嘅Duplo積木作主題,入面嘅「木馬」有唔同造型,色彩繽紛好別緻,莫講話其他地方,其他LEGOLAND都搵唔到架。
▲Brick Party ,130cm以下小童要由成人陪同。
同咖啡杯玩法差唔多嘅Imagination Celebration同樣係全球獨家,同森永旗下嘅Pino雪糕大玩crossover,即係一粒粒有朱古力包住嗰種,外形好特別,唔好錯過。
▲Imagination Celebration,130cm以下小童要由成人陪同,身高唔夠90cm就唔玩得。
去到冒險世界就一定要玩Submarine Adventure,潛入水底唔只有魚睇,仲可以睇到用LEGO砌成嘅「文物」;仲有一個水上活動S.Q.U.I.D. Surfer,大家將會登上超高速嘅飛船衝浪,隨時中水炮!
▲Submarine Adventure 同英國 LEGOLAND 玩法差唔多,130cm以下小童要由成人陪同。
▲大家將會潛入水底,欣賞LEGO砌成嘅海底世界。 (LEGOLAND圖片)
▲S.Q.U.I.D. Surfer相當高速 ,身高要有105cm先玩得,130cm以下小童要由成人陪同。
▲岸上嘅人可以發動水炮
上水之後可以繼續探索法老王嘅世界,有小朋友最鍾意嘅波波池Pharaoh’s Revenge,仲有另一LEGOLAND另一經典設施Lost Kingdom Adventure。
▲處處都充滿風味
▲Pharaoh’s Revenge 並冇年齡及身高限制。
之後就帶大家返番去現代嘅LEGO City, LEGO人仔飾演我哋不同職業,例如警察、廚師、記者等,非常得意。小朋友一場嚟到,記得考番個車牌,兩個Driving School適合唔同年齡嘅小朋友。
▲Driving School 有職員從旁指導,專為6-13歲小朋友而設;而Junior版則為3-5歲小朋友而設。
▲拎完「駕駛執照」記得寫返自己個名上去!
除咗揸車,呢度仲可以揸船、揸飛機,仲有揸消防車救火!小朋友可以同爸爸媽媽同心合力,撲滅大廈嘅烈火。
▲Coast Guard HQ,130cm以下小朋友要由成人陪同。
▲Rescue Academy 讓小朋友同爸爸媽媽合作;想玩就要有90 cm,夠130cm自己玩都得,唔使成人陪。
轉個頭又去咗中世紀,王國外有一個士兵瞓咗喺地下,唔通佢仲咗箭?呢個區域內有成個樂園中最刺激嘅Dragon’s Coaster,當然對比外面嘅過山車,呢個屬小兒科。樂園更悉心安排咗另一條隊俾細膽嘅小朋友玩Dragon’s Apprentice,輕輕鬆鬆兜兩個小圈,一樣都體驗到過山車嘅滋味。
▲呢個士兵好過癮,記得影低佢!
▲Dragon’s Coaster 全程20秒玩完,有玩過嘅朋友話有離心力架;未夠105cm唔玩得,130cm以小朋友就要成人陪同。
▲呢個BB版叫Dragon’s Apprentice,有90cm就玩得,外形都cute啲。未夠130cm嘅小朋友同樣要成人陪伴。
呢個區域嘅設施,顧名思義都係同海有關!水花大戰讓水上同岸上嘅人激戰,就算自己唔排隊都可以襲擊下水上嘅上,夠晒互動。呢度隻海盜船仲識360度搖晃,考考下大家平衡力!
▲水花大戰 Splash Battle,130cm以下小朋友要由成人陪同。
▲海盜船,要有90cm先玩得,未夠130cm嘅小朋友要由成人陪同。
下頁:仲有一個區域,一次過睇日本多個城市嘅Miniland!