| 地址 | 訊號山花園 |
| 日期 | 全年適用 |
出世到而家30幾年，每年去尖沙咀不下二百幾次，真心唔知九龍鬧市中竟有「訊號山花園」這座秘密花園!
而且園內寧靜無人，仲有維港海景、歷史古蹟做影相位添!
當然可能係我新界仔見識少未聽過，但我到訪時所見香港人真係只有小貓數隻，大尾篤係佢二百倍!
雖然明知而家講出嚟佢可能又變另一座嘉頓山，不過我作為旅遊Blogger嘅宗旨就係要介紹鮮為人知嘅秘密地方嗎!
秘咩密吖~~~~~~~ 大把菲律賓姐姐喺度野餐開P歡樂今宵呀~
有時我都諗，啲姐姐分分鐘比我地更熟悉香港有咩窿窿罅罅……………….
1. 地理位置
2. 入口與中層
3. 訊號山花園
4. 訊號塔
5. 訊號塔內部
6. 花園其他地方
「訊號山花園」地近尖東，正式入口係棉登徑緬甸臺，不過由尖東中間道出口行入去都可以~
作為一個曾經嘅大學生，當年係棉登徑都唔知經歷過幾多場生死搏鬥，那段「3舊水任飲，用個肝做人」的日子真係令人不勝唏噓~
邊會估到十幾年後我會為行山打卡而來呢度!
Anyway，呢個就係入口啦~
痴線真係30幾年來都唔知尖沙咀有個咁嘅花園……..
唔好俾入口嗰條大斜路嚇親!