親子郊遊｜長洲小長城 驚喜十足的奇岩怪石小徑

「長洲? 咪糯米糍、篤魚蛋，兼去東堤試膽law！」

大鄉里的我，係香港活咗30幾年，到了不惑之年，先知長洲有不少非常不俗的行山徑！

而我今次行完的短途路線「長洲小長城」，除咗易行兼風景優美，更有大量奇石打卡！

長洲嘅精髓，原來係郊外山野呀！

起點 — 觀音灣泳灘

不論係小輪、遊艇、洗頭艇定游水，總之用自己方法到達長洲碼頭後，直穿過「東灣路」，到達就算封咗泳灘仲係好多人的東灣海灘，望住個海向右行，到達觀音灣後會見到有條路上山至「觀音古廟」。

但如果好似我咁食完嘢先出發，又行錯路，可以係大熱天時，烈日當空下穿過民居內街，沿「關公忠義亭」旁的觀音廟路進入。

未見官先打三十，未正式行已經衣衫盡濕……….

小長城

觀音廟旁的分歧路向前行，就正式進入「小長城」路徑了，呢度會有小長城的路線圖，清楚指示路上可以睇到甚麼奇岩怪石~

起行啦！一開始會是一段約5分鐘的樓梯，30幾度下，戴口罩都有少少chur，嚟得行山就預了，上啦!

如果真係行到喘氣，就唞一唞啦，係高處俯視的觀音灣及東灣好靚呀！

^咁睇東灣+觀音灣又真係幾唔錯

終於來到小長城！

「下………個名玩到咁大，原來只係一堆沙田中央公園可見的石柱形欄杆？」又好似mean得滯…….. 外國咪又係幾棵樹起間屋就係乜乜小京都、物物小瑞士……..平心而論，識得就角度的話，呢個小長城某d位都影得過。