| 地址 | 滘西灣 |
| 日期 | 全年適用 |
編按：踏入夏天，小朋友的泳衣又要出動。除公眾游泳池、沙灘外，家長都可以帶小朋友坐船去外島玩水。近日有媽媽就帶兩名小朋友去外島嬉水，還可以到三萬尺的漁排釣魚。最重要是小朋友玩足全日都只需$80，認真抵玩 !
===============================
趁好天去玩喇! 俾我搵到一個好地方，一個價錢可以係漁排釣魚之餘，仲可以去埋玻璃水沙灘遊玩，抵啊!
呢個地方本身係一個收費垂釣樂園，俾人喺一個面積頗大嘅漁排上釣魚，依家發展到載埋人去鄰近嘅外島玻璃水沙灘嬉水、浮潛，係可以玩足一日嘅親子好去處~
首先，係西貢碼頭坐專屬船隻去漁排，船程約半個鐘，去到後我哋先釣魚，漁排免費提供釣魚具，但需自費買魚餌 （建議上船前去漁店購買），$20得4隻大蝦!
好好彩，我哋都釣得幾條魚仔，不過小朋友梗係想釣大魚，見差不多午膳，所以就俾錢係養魚網釣大魚加餸 （約$250至$450不等），保證釣到為止，釣到嘅魚俾$50加工即煮即食，跟手點埋其他菜，價錢尚算合理 （餐蛋麵$40/碗，炒粉麵飯$90/碟，海鮮菜式就海鮮價），漁排上用餐不要期望好高質，但就別有一番風味囉。
食飽飽就搵漁排負責人載我哋到外島沙灘，快艇船程5分鐘以內 （真係要游都游到上岸），呢個沙灘嘅沙雖比不上浪茄大浪西，但也不算差，只係岸上比較多海草，玻璃水水質適合浮潛，間中可見到魚仔游來游去，小朋友仲玩到跳水，玩到夠皮就call船返上漁排沖身換衫，再坐船返去碼頭!
呢個地方真係玩足一整日，最緊要係漁排上有瓦遮頭，唔怕曬又冇蚊，小朋友係勁開心，大人都玩到謝皮，收費仲要好相宜小童/$80位 & 大人/$150位 ，可以Encore再去嘅親子好去處。
