最近知道喺新蒲崗四美街有個最新落成嘅東啟德公園，入面有個兒童遊樂場「彩虹樂園」好特別。所以就趁小朋友喺附近參加表演活動後，就帶佢哋過嚟去玩下。 

星期六嘅下午，人流特別多。所以提提大家都要好好看顧好自己小朋友呀！

呢個「彩虹樂園」好特別，因為佢無傳統一座座組合式遊樂設施，以遊樂體驗作整體規劃，場地更分為四個區域：森林歷奇、叢林探索、旋轉綠地同健體園地。 

森林歷奇

1) 山丘：滑梯與隧道（適合2歲+），攀上滑下，好玩之餘又可以培養小朋友膽色同信心。

2) 旋轉吊椅（適合5-15歲），罕見少有＋刺激好玩，又可以訓練平衡感。

3)  圓形/ 方形及大型彈牀（適合3歲+），小朋友最愛嘅彈牀，呢度仲有3款咁多。可以鍛鍊小朋友四肢同肌肉協調力。

叢林探索

1) 攀爬小刺蝟（適合2-8歲），超可愛嘅小刺蝟，比小朋友攀爬有助建立空間感。

2)   攀爬小山丘與隧道（適合2歲+），山丘裝置可玩攀爬、瀡滑梯和穿越隧道。訓練四肢靈活度。

3) 繩網攀爬架（適合3歲+）  ，鍛鍊小朋友四肢／肌肉力量同協調能力。

4)   彈簧平衡木（適合5歲+），Alfred話呢個好玩，因為真係好講求平均同靈敏度。

5)   攀爬及平衡步道（適合4-12歲），富有挑戰性，培養小朋友克服困難同毅力。

旋轉綠地

1) 友誼氹氹轉（適合4-12歲），好有媽媽細個玩氹氹轉嘅感覺，小朋友不自不覺會追求更快速度感，好玩刺激！

2)  人力滾輪（適合6歲+），另一罕見少有嘅人力滾輪，小朋友化身成小倉鼠咁，不斷前行來推動滾輪轉動，考驗平衡力。

3)   旋轉椅子（適合1歲+），旋轉椅子帶嚟速度嘅樂趣。

4)   幻變轉盤（適合0歲+） ， 幻變轉盤嘅圖案隨時令到您頭暈   XD

▲圖片擷取自Playright Children’s Play Association專頁

5)    雨聲機（適合0歲+），弟弟超鍾意呢個，因為推動雨聲機可聽到淅瀝嘅雨聲。

健體園地，包括：跨腿訓練　及　卧式單車。

▲圖片擷取自政府新聞處

總結：雖然呢度唔重好大，但滿足唔同年齡人士嘅需要。我最估唔到佢啲遊樂設施最細0歲+就玩到，真係少有。另外，上網得知呢個公園係由智樂從小朋友口中收集唔同意見，以好玩遊樂場嘅五大原則（包括：挑戰性、多嘢玩、啱我玩、可以一齊玩、方便玩。）歸納得出以遊樂體驗作整體規劃。而且值得一讚嘅係，其中一個出入口增設洗手裝置，同埋呢度每個區域均設有兒童友善嘅指示牌，圖文並茂清楚講明每個設施嘅適合年齡同玩法重點。

其他設施包括：寵物公園、緩跑徑、健身園地、卵石路步行徑和社區園圃等。

==========================================

東啟德公園「彩虹樂園」

地址：新蒲崗四美街（鄰近采頤花園）

可由港鐵鑽石山站B出口步行約8分鐘或乘搭多條巴士及小巴路線到達。

==========================================

（以上資料更新至撰文當日）

聯絡電郵： alfredbb325@gmail.com

最近開始玩IG，歡迎追縱：allaboutalfred

最近開始玩MeWe，歡迎追縱： https://mewe.com/p/AllAboutAlfred/

追踪更多育兒生活分享，請按 Alfred 成長日記

作者：Alfred 媽媽