沉寂咗一排，只因太忙，估唔到搬完仲未忙完。好耐冇帶龍鳳寶寶去玩喇~今次介紹一個中秋節活動，要一個半月前book，所以未忙完都冇得唔去架。
***放天燈***
喺香港都有得放天燈???
活動負責人一拎個天燈出嚟，豬隊友不斷話喺香港放天燈犯法架!!!!!我話佢聽埋先啦~豬隊友又再講喺香港放天燈犯法架!!!!!我都話聽埋先啦… …負責人即刻話我哋唔用蠟、唔用火放天燈就唔會犯法架喇~(真係失禮晒)
由於天燈唔會飛好遠，所以可以執返屋企留為紀念。放之前，小朋友仲喺天燈上畫畫，製作屬於自己嘅天燈。
畫天燈要自備畫筆，建議帶備顏色水筆(但小心過底，要搵嘢墊住)。我哋帶咗粗蠟筆，d圖畫唔係咁出，比較難睇到。
***聽中秋節繪本故事***
由負責人講中秋節故事俾小朋友聽，令小朋友更加認識中秋節。而且仲講解一些有關農作物嘅小知識，上咗一堂常識課。
***掘芋頭***
龍鳳寶寶去做農夫秋收芋頭呀~小朋友拃住個小鏟掘芋頭，小朋友覺得好新奇。
***製作冰皮芋泥月餅***
掘完芋頭，成個大芋頭可以拎返屋企。因時間關係，蒸芋頭已經準備好，我哋可以自行加煉奶去決定甜度，唔怕太甜。
小朋友幫手用手壓芋泥。另外，負責人亦預備好紅豆泥，味道亦不甜，也可自行加南瓜籽，感覺更健康~
同小朋友一齊整咗十個小冰皮月餅。整月餅要戴膠手套，但只有成人膠手套提供。唔知出邊有冇d小朋友膠手套買呢?如果有，最好自備。
***品嚐香蕉蛋糕和豆腐花***
最後仲有得品嚐農場自家製香蕉蛋糕和豆腐花，唔太甜，而且好好味。但份量唔算多，暫時頂住個肚仔先。
~~此乃自費活動~非廣告~~
地點:大埔Veg Garden
(大埔墟站轉乘23k小巴，總站落後，步行2分鐘)
日期: 2021年9月18日(六)
費用:
一大一小: 300元
兩大一小: 380元
一大兩小: 520元
(依個係今次活動嘅價錢，不同活動不同收費)
活動雖然已完結，
但主辦單位不時會因應時節舉辦唔同嘅活動。
同埋一定要預約先有得玩架!!!!!
嚟緊有摘南瓜活動啊~
之前有得摘西瓜同菠蘿，
整pizza，
好似都好好玩咁~~
有興趣可以睇吓:
活動資料:
https://www.facebook.com/groups/1455511671429783/
~大部份時間都留喺有遮蔭和有椅子嘅地方，所以唔算太辛苦。
~只係放天燈時同埋掘芋頭時較曬，記得帶備防蚊和防曬用品。
~農場內有廁所和洗手盆，但亦建議喺新達商場或港鐵站先去洗手間。
~整月餅時，因坐位近強力風扇，所以膠枱布和膠手套可能會被吹走，建議帶定私家用品壓住。
~建議自備小食給小朋友，怕太長時間，小朋友會肚餓。
~可以喺大埔墟車站附近嘅便利店或超級市場購買定少許糧食。
*****************************************************************************
豬隊友的日常後記:
經過便利店，我入去買咗條卷蛋。之後經過超級市場，佢問我使唔使入去買少少嘢食，佢話便利店嘅嘢食唔岩食。吓…其實我哋要搭小巴… …再唔搭會遲到，頭先喺便利店又唔買… …趕時間仲要揀飲揀食，點解我湊住三隻馬騮出街.. …(決定下次唔帶大個隻出街)
後尾佢解釋話唔知我喺便利店買卷蛋，話自己未瞓醒喎… …
******************************************************************************
我會繼續為大家發掘和介紹更多好去處~
想更快更快得到更多免費資訊，請讚好以下專頁~謝謝~
~Facebook page:
https://www.facebook.com/Miss.swanswan
~Instagram: (更多孖寶和孖媽的生活趣事)
https://www.instagram.com/little_twin_stars82
唔好錯過以下文章啊 !!
其他創作文章(包括68個好去處):
https://www.facebook.com/Miss.swanswan/posts/341412797292614
作者：龍鳳孖媽
其他文章：
