最近知道喺炮台山有個新起嘅東岸公園，趁Alfred喺附近參加完課外活動後，就帶佢哋過嚟去玩下先。
東岸公園距離炮台山地鐵站約7分鐘步程，由地鐵站A出口經油街轉入電器道，至屈臣道街尾即可到達。今日係第一日開放，沿路人都好多呀。
一入到去，先見到有個超大個草地，草地上有唔小座椅同遮陽設施。
而草地另一邊就係一個面積頗大嘅兒童平衡車試驗空間，有兩條彎彎曲曲嘅車路比小朋友玩下車。
喺兒童平衡車試驗空間隔離，就會見到海濱標誌性、超吸睛同超巨型字體嘅「VICTORIA HARBOUR」打卡藝術燈牌，成為我哋可以隨時走到「字裡行間」影相打卡。至於夜晚時分，字體更會發出光芒，照亮炮台山一帶嘅維港海旁。
再行入小小，就會見到地下有個類似「跳飛機」圖案同一條類似膠櫈嘅裝置，好多小朋友都係呢個長膠櫈上面爬上跳落，自娛一翻。
另外，跳飛機隔離就係兩條小遊樂滑梯，小遊樂滑梯設喺安全地墊上面，小朋友爬上跳落都好安全。同埋，雖然小遊樂滑梯比較短，但Alfred 話速度感都唔錯呀。
而兩條小遊樂滑梯背後，就係區內最大特色嘅維港首條向公眾開放嘅防波堤，真係超近距離360度飽覽維港景致。而且防波堤上，亦設置咗唔小大大小小波浪型嘅休息椅。
最後，就係防波堤末端有獲獎嘅大型排風口，成為東岸公園主題區嘅一幀特別風景同影相打卡位之一。
總結：呢度地方真係好大，而且每個區域都分得好仔細同有點距離。不過如果小朋友無平衡車或帶車嚟玩嘅話，呢度嘅兒童玩樂設置就真係比較小（只有兩條小遊樂滑梯），但勝在環境好，有足夠地方比小朋友跑跑跳跳。如果大家都係附近嘅話，都值得一去影下相嘅。
溫馨提示：
-保護環境，自己垃圾，自己帶走。
-地方比較空曠，請做好防曬或防蚊措施。
-疫情緩和都唔可以鬆懈，記得勤手洗/搓手，勿摸眼、口、鼻。
========================================
東岸公園主題區（第一期）
地址：炮台山屈臣道以西（炮台山地鐵站A出口）
開放時間：24小時
交通：從港鐵炮台山站經油街轉入電器道，至屈臣道街尾即達，步程約7分鐘
========================================
（以上資料更新至撰文當日）
聯絡電郵： [email protected]
最近開始玩IG，歡迎追縱：allaboutalfred
最近開始玩YouTube，歡迎追縱： allaboutalfred
作者：Alfred 媽媽
