香港郊遊 | 上窰郊遊徑+曝罟灣堤圍︱超強打卡+輕鬆行山首選


全年適用

香港郊遊 | 我去「上窰郊遊徑」的目的,原本只為IG上有啲紅的「曝罟灣堤圍」,誰不知條路驚喜處處!不但短途且平坦易行,除曝罟灣堤圍外更有紅樹林、無人碼頭等打卡點,終點萬宜水庫西壩的日落更係靚到嚇親人!!!如果係社交媒體狂熱者,呢條郊遊徑真係分分鐘打卡打到手軟!

廢話少講,開始介紹啦~

香港郊遊 | 文章概要:

前往方法
北潭涌自然教育徑及上窰民俗文物館
起子灣紅樹林
起子灣小碼頭
曝罟灣堤圍
上窰郊遊徑
萬宜水庫西壩
回程方法

前往方法

由西貢坐94、96R、289R,於「上窰」站落車,呢個係最近的入口點~
但如果想去個洗手間放低幾兩,又或買支水買串燒賣先,建議係「北潭涌」落車補給咗先~

呢個地點嘅小賣店竟然仲有$10一支維他水,算係非常有良心了!

總之搞掂後,出大馬路向左方前進,經過傷健樂園,約5-10分鐘就可以見到「北潭涌自然教育徑」的入口了~

喂阿鋒你玩嘢呀?又話行上窰郊遊徑嘅?

事實上一般香港行山友話行「上窰郊遊徑」,但事實上行嘅都係「北潭涌自然教育徑+上窰郊遊徑」crossover,先行前者再接後者,因為睇嘅風景會靚咗多咗~
需知個道理等於蝦餃落豬肉會好味啲,混血BB都會靚仔啲,有時啲嘢溝埋一齊個效果好好多~

如果大家死都要行上窰郊遊徑的,無問題~ 可以回程的時候行返去北潭涌的~

北潭涌自然教育徑及上窰民俗文物館

一開波起行已見到清澈的北潭涌河口~ 好想跳落去游水啊~~~~

但點解我自動幻想咗會有鱷魚出現嘅???

行咗唔夠10分鐘已到第一個check point「上窰民俗文物館」~

根據資料,上窰民俗文物館及灰窰於80年代初列為法定古蹟,內裏重現了古時客家村落的生活文化,等大家認識客家除左梅菜扣肉和釀豆腐仲有好深厚的歷史文化~

可惜疫情時暫時關閉,如果唔係入去行下應該都幾有趣~

起子灣紅樹林

繼續前行會有數個分叉路

第一分叉路轉左會係「上窰家樂徑」或接「上窰郊遊徑」,sorry唔行呢條路~ 繼續前行plz~

呢個鬼仔,我開始行時佢開始跑,我走人時佢都係跑緊,乜料

第二分叉路向右係黃宜洲村,向左係起子灣~
黃宜洲村係私人地方死路來的,亦無咩嘢睇,所以都係直去起子灣啦~

點解我會知無嘢睇?

好明顯我中咗伏啦~~~~ (網上有篇文話係轉右,我信咗……..)

走過一小片草原,到達起子灣紅樹林啦!!!
紅樹林周圍都有啦~ 赤徑、鹿頸谷埔等等,我自己寫過的都唔少,有咩咁特別先~

特別在整個內海灣都係超矮身的紅樹林~

好似好多個小樹人企係海灘上勁得意~

只係啱啱開始行咗唔夠半個鐘,已經令我覺得呢條郊遊徑無嚟錯!

起子灣小碼頭

俾紅樹林謀殺唔少memory後,係時候去下個影相點「起子灣小碼頭」~

前行5分鐘至另一歧路,左邊係繼續前進,右邊行多5分鐘就係起子灣小碼頭

無錯,起子灣小碼頭係要離開原路特登行去的,而且一定會有人話「都係一個乜都無嘅小碼頭啫,有咩咁特別?」

就係貪佢乜都無!!!

一個寧靜無人,腳下海水翠藍清澈,被群山360度圍繞的無人小碼頭,仲唔係影相擺pose既最佳地點???

呢度咪行山女孩bar top show身材嘅最佳地點囉~

拜託……..請不要幻想我著bar top……….

 

曝罟灣堤圍

原路返回分叉路,繼續前行,進入樹林,開始有返啲行山嘅感覺了~

曝罟灣堤圍雖然係我今次行程重點,但其實佢並非正式路段,路段被樹林隱密封閉,十幾廿年前根本無咩人會去添

想落去,大概係從上面講的起子灣分叉路起計行約10分鐘,於林中有一無路牌的分叉路向右行直落

如果怕搵唔到,就認住呢幾條紫色紅色絲帶啦~

下行至曝罟灣呢條路的確比較難行

早段都叫有山路,到沿海去堤圍一段卻是側斜石路,如果對行石經驗不足,膝頭唔好,又或對鞋太弱嘅都係小心啲好

 

終於到達我呢次郊遊最想去嘅地方「曝罟灣堤圍」啦!!!!
嘩人都唔少喎~ 條堤會唔會冧㗎!!!!!!

所以我都係岸邊影下相,等人哋測試咗塌唔塌先啦~

一如上圖所見,呢個曝罟灣堤圍呈半月形狀,係以前村民作養魚之用

如今人去樓空,堤圍亦日久失修無人打理,點估到幾廿年後呢度會變成打卡熱點~

試想像下——–

陽光在海面閃閃發亮,海中之路又狹又長,陳舊卻帶點殘破美,令人彷如置身動畫中的海上遺跡,在大海中心悠然漫步,唔係一件非常吸引人嘅事咩~

呢個曝罟灣堤圍實在非常特別! 不過有幾點卻要非常小心:

1. 堤圍非常狹窄僅容一個人通過,如果想超前的話,建議先練成跳高過一個人的技能
2. 提圍有3處已斷裂,對平衡力無信心的朋友,可以坐住過、朋友拉你過,或者預備泳衣。

由於小弟太過鍾意呢度,hea到樂而忘返,幾乎唔記得行程只係行咗一半,再唔走天黑㗎啦……..

到5點先急急腳由堤圍另一邊離開

上窰郊遊徑

呢個世界既定理就係 ——– 個人一急就出事!

因為趕住,我去到分叉路位唔記得睇地圖,咁啱又撞到係堤圍幫手影過相的一家人,見佢地轉右我又跟埋轉右,仲因為腳步急而過咗佢地頭。

點知條路愈行就愈窄,啲草愈行就愈高,到後來直情入咗粟米田咁款,隨時有隻速龍出嚟吞咗我!

我開一開gps,google map無呢條路嘅!!!????

仲要我行咗15分鐘都仲係海邊兜緊,完全無上返上窰郊遊徑的意思!

咁我就知呢條路唔對路,立刻沿路返返分叉路!

回到分叉路我遇上另一家庭,父親似係行山老手,好心提醒我果條路連地圖都無的,雖然都去到終點西壩但又長又難行。

所以我都係度好心提醒大家 ——- 由曝罟灣堤圍回上窰郊遊徑,分叉路記得認住絲帶轉左呀!!

轉左條路都唔算好行,但感覺上正路好多!

只不過要上約10分鐘樓梯,算係今次行程最辛苦既一段

10分鐘後,終於可以接返上窰郊遊徑向萬宜水庫西壩前進~

行平路嘅感覺真係好呀~

而且沿路可以遠晀西壩,風景超一流!

萬宜水庫西壩

根據路牌,由曝罟灣營地落返萬宜路要45分鐘,但根據小弟實測,由接返上窰郊遊徑開始,到終點落返萬宜路其實不用半小時~

總之,終於來到萬宜水庫西壩,行完了!!!

唔好完住~~~~ 西壩一樣有超正既風景~

就算唔得閒落去影白千層,水塘同我荷包一樣咁乾,望下右邊——-個日落正到痴線呀!!!!

萬宜東壩去得多,但西壩就真係比較少嚟~ 估唔到景色一啲都唔輸比東壩喎!

如果仲有力嘅,我非常建議再向前行,去到正式西壩位置,欣賞以湖海群山為襯的日落晚霞~

時間體力所限,我無再落去天文公園月明亭果邊再玩了~

聽聞西壩係香港著名觀星地點,就搵個機會搵返幾個女仔一齊再嚟~

咩啫~~~~ 唔通一班男人睇星咩! 睇星矢算啦!回程方法

一般網上嘅教法,都話離開可以行返上窰郊遊徑返去,真係見到都嚇一跳!

即係幾乎原路行返相同時間返去 !?

唔係唔得,只係嚟到終點先話呢度係中間點,道氣都洩哂邊行到啊??

就算行馬路都要1個鐘,唔好玩啦!

所以最佳方法都係call車~
甚至而家有啲的士司機知道東西兩壩人多,會自己吉車入嚟接walk-in客

我就係截到架無蓋旗嘅綠的,輕輕鬆鬆10分鐘出番北潭涌~

做咩唔出西貢??

北潭涌已經有巴士出西貢、彩虹even沙田,由西壩至北潭涌綠的只係$30-$40,出返西貢市中心分分鐘起double

而且你慳咗錢,的士佬慳咗時間可以走多幾轉東西壩,大家win win何樂而不為?

上窰郊遊徑+曝罟灣堤圍的遊記就到呢度~

講真呀個風景真係超級靚得嚟又多樣化,又9成係平路,曝罟灣堤圍更係香港難得一見,無唔去嘅理由啊~ 我奇怪呢條路竟然唔太hit tim!
定係已經勁hit咗係我唔知咋??

又無意中寫咗好多字,不過最後都有啲小貼士~
沿路都無洗手間,真心建議出發前係北潭涌解決先~
我呢個行程如果直衝,兩個鐘一定攪得掂~ 不過你見啲風景咁鬼靚,計埋影相最好都係預要3-4小時好啲。

有睇過文章話呢條路連傷健人士坐輪椅去都無問題,如果由起點至起子灣小碼頭我相信無問題的,但曝罟灣堤圍就一定無可能。而且就算唔落堤圍,起子灣至曝罟灣營地一段都係平路但多石,並非輪椅人士輕易攪得掂的。定係而家已經有越野用輪椅㗎啦??

 

圖文經 鋒加西亞 – 德國工作假期後的世界流浪 授權轉載
Facebook:https://www.facebook.com/Garcia.in.Germany
Instagram :fung_garcia_backpacker

 

其他閱讀:

西貢泥涌︱大海、夕陽與天空之鏡


熱門文章

室內遊樂場|全港21大好玩室內放電遊樂場
親子餐廳 2022|全港32間親子餐廳合集 攀爬架/室內沙灘/靚靚打卡位
假日好去處|7.1長假活動合集 大型吹氣滑水梯+超靚打卡位+恐龍展覽
室內遊樂場 | 屯門全新開幕playhouse佔地8900呎 有滑梯繩網、跳彈牀、沙池
室內活動|《小王子》登陸MegaBox 5大打卡位+10呎高B-162星球

全港遊樂場|41大兒童遊樂場推介 攀爬設施+可愛造型|親子好去處 (不斷更新)
假日好去處|7.1長假活動合集 大型吹氣滑水梯+超靚打卡位+恐龍展覽
滑輪好去處|屯門11萬呎空中滑輪運動場 放電好去處
恐龍 迷注意|恐龍登陸九龍公園 影相打卡+免費活動+特色奬品
親子行山|初夏行山 香港仔水塘|大眼睛與小眼睛
親子好去處|旺角綠洲嘉年華 寵物共融+手工工作坊+攤位遊戲
查看更多   ▸