親子燒烤場 ｜呢幾日感受到點秋涼喇，又到咗燒烤BBQ嘅季節！我哋急不及待即刻去燒，呢度四月新開幕，新淨乾淨，望住海景燒嘢食景觀超靚，我哋嗰日去一陣陣海風勁舒服，燒烤場有瓦遮頭有大風扇，非常通爽唔焗。老公好怕熱㗎，都話好唔錯。
帶小朋友去燒嘢食梗係要有嘢玩啦，有大草地小朋友任跑！彈牀、滑梯、攀爬、歷奇⋯最正係個勁大充氣彈牀玩水 另外仲有籃球機、單車、鋼琴⋯唔止玩仲有動物睇！有兩隻孔雀、大龜、魚魚 以上入場燒烤全部免費任玩！性價比高，任玩任食5小時，平日成人$160/小童$100，90 cm以下免費！
食物方面款式選擇都幾多，味道都唔錯，唔會死鹹！幼兒啱食有麵包、番薯、粟米蔬菜、雞扒都啱妹妹食！ 有冰菠蘿買，爽！當日我哋假日去都唔多人，玩得勁開心勁舒服！
我最鍾意小朋友玩樂嘅地方就係圍住燒烤場側邊，揀側邊位坐方便大人可以望住啲小朋友玩！留意充氣彈牀玩水嗰邊係向西嘅～四五點開始會晒住燒烤 ，哋揀咗向海嗰邊真係一流，唔晒唔熱！
玩水記得帶泳衣，有沖身嘅地方，夾公仔機另外收費，其他全部免費任玩。仲有獨木舟、露營玩，需要另外收費。
地址：大埔大尾篤汀角路202號
電話：9448 7890
詳情：按此
＊鴻運燒烤煌日前宣布預計嬉水池開放大約到10月中，視乎天氣而定，由嬉水池開放時間只於星期五、六、日。
圖文獲 初初媽媽 ChochoMama 授權轉載
其他文章：
親子好去處｜漁農自然護理署 免費參觀瀕危物種+毛皮+活生寵物
