想帶小朋友去公園放電 ，太陽太晒驚中暑 ，落雨又濕晒無得玩，咁觀塘呢個公園就啱哂啦 。呢個公園叫做 「 感官花園 」坐落觀塘海濱公園 ，因為位置在天橋之下，所以不怕日晒同雨淋 。
當日我哋係黃昏時段去到，有海風吹住，好舒服 ，完全唔覺得熱。「 感官花園 」有4個區域，「聽覺 」，「視覺 」，「觸覺 」和「嗅覺 」區。
豬仔包最鍾意係「聽覺 」區，有得敲鐘，又可以聽吓風聲同音樂 。而媽媽就覺得「嗅覺 」區有驚喜，一開始聞係無味，原來要按下半圓球，等空氣流動，就可以聞到青草味道，好特別。
由於感官刺激能幫助兒童腦部發展，加強記憶力和提升學習能力等等，非常適合幼兒去探索一下 。除咗４個區域，還有一些遊樂場設施，而且空間廣闊，小朋友周圍走都唔怕撞親。
玩完「 感官花園 」，豬仔包再玩埋對出小小嘅「兒童遊樂場 」，一個好似長蛇嘅裝置豬仔包來來回回玩到停唔到，另外個攀石裝置，媽媽覺得係打橫爬，但又完全想像唔到應該點爬先可以獨自爬到尾又唔會跌落嚟 ，可能大一點嘅小朋友才能做到吧。
除咗遊樂場 ，原來仲有玩水嘅地方 。豬仔包其實未玩「 感官花園 」之前見到有小朋友玩，已經想衝過去，但因為媽媽唔知有水玩，所以無特別帶多套後備衣服。
但玩完所有遊樂設施後，豬仔包仍然念念不忘個噴水裝置，媽媽嘗試打開個袋揾吓會唔會之前帶嘅衫無攞出嚟，又真係比媽媽揾齊所有後備衣物，除咗褲 ，由於豬仔包真係太想玩，唯有着住底褲仔玩啦。一開始，發覺係無水噴出嚟，後來先揾到原來地上面有個開關感應，踏上去先會噴水出嚟，又幾真係幾環保喎 。
豬仔包一開始有少少驚，只敢圍住噴泉外面行，不過玩咗一陣，已經可以慢慢嘗試行近啲，到最後梗係走嚟走去玩得勁開心啦。唔單止小朋友，仲有兩個大哥哥姐姐後來都加入玩埋一份，如果唔係趕住番屋企，豬仔包應該可以玩好耐。
除咗玩樂，響風和日麗嘅日子，仲可以響草地野餐 ，散吓步，吹吓海風，非常Chill，仲可以體驗一下低碳綠色生活添。
地址：觀塘海濱路175號
音樂噴泉及嬉水區 開放時間: 每日上午8時半至晚上10時半(定期保養日除外)
電話：2346 8538
詳情：按此
圖文獲 豬仔包の開心日常 授權轉載
其他文章：
