| 日期 | 全年適用 |
又到幼稚園春季旅行嘅日子！Blogger 80後爸B 同阿寶去到大埔蝶豆花園，呢度唔單只大，仲有好多嘢玩，加埋 羊駝 、天鵝湖，打卡最啱！
園內有好大個湖，入場套票包埋坐天鵝船，限時15分鐘，慢慢踩好hea。坐完天鵝船，仲可以餵魚，阿寶一放魚糧，啲錦鯉就伸頭嚟食，有冇咁餓呀！？
天鵝湖隔離有條許願橋，可以喺 羊駝 牌仔寫願望再掛上去，條橋影相打卡都幾靚！好多農莊都有羊、烏龜、兔仔，呢度特別啲，有 羊駝 ！可以俾錢走入圍欄近距離接觸，不過隻隻都高過阿寶，喺圍欄外面餵紅蘿蔔就算…
呢度仲有好多打卡位，風車、花海、壁畫，仲有地台鋪咗啲鏡嘅天空之鏡，影相嘅時候倒轉部電話，可以影到天空嘅景致；不過爸爸影嘅時候唔識，影極都唔似，事後先知個技巧。
除咗動物同打卡位，當然唔少得玩嘅地方，有繩網、彈牀、長滑梯，仲有得DIY整 羊駝 錢罌、皮革鎖匙扣，不過阿寶未識用鎚仔揼皮革，最後都係交俾爸爸出手。
入面仲有間幾有feel嘅café，可以食藍色嘅蝶豆花雪糕，仲可用入場費送嘅代幣夾 羊駝 公仔，不過爸爸媽媽一個都夾唔到…
開放時間：星期一至日 10:00-18:00
地址：大埔鳳園路8號
收費：
成人$200（包括觀光船票、天空之鏡拍照、夾 羊駝 公仔幣3個、DIY真皮 羊駝 印鎖匙扣、DIY拼圖 羊駝 筆筒和祈福牌）
小朋友$150（3-12歲）（包括觀光船票、天空之鏡拍照、任玩充氣彈牀和沙池、夾公仔幣3個、DIY彩繪錢罌和沙畫）
不足3歲或以下免費入場、長者半價
（親親 羊駝 $60送飼料一份）
按此了解更多「蝶豆花園農莊」
作者：80後爸B，原文刊登於「阿寶與爸B 生活日常」FB專頁
其他文章：
