| 日期 | 全年適用 |
今年Aidan生日之旅，我哋選擇了好受歡迎嘅「愉景灣酒店」慶祝，每次去愉景灣都感覺去了外國一樣，歐洲小鎮風情，有打卡教堂、有沙灘、有公園、有室內遊樂場，仲有好多餐廳，玩兩日一夜都玩唔晒！
我哋好早就去Check in，酒店職員好親切，好熱情同兩兄弟玩，知道哥哥生日，仲送左隻小熊公仔俾佢，弟弟都有份呢，好開心呀！酒店大堂好開揚，設計充滿海洋氣息，令人感覺到度假嘅氣氛。
今次入住「愉景灣酒店」嘅海景豪華客房，一入房兩兄弟都嘩嘩聲呀！L 形設計嘅落地玻璃全部面向海景，房間有一半被海包圍，一望無際嘅大海景真係勁靚，瞓喺牀上就可以睇到日出喇！房間寬躺舒適，有兩張大沙發，張特大Queen size牀好舒服，牀褥軟硬適中，當晚都瞓得好舒服呀！
我哋仲加錢join咗「童玩樂趣及房間慶祝佈置服務」，真心驚喜呀！除咗有禮物玩具之外，房間佈置得勁靚，小帳幕兩兄弟一見到就即刻衝入去玩喇！我只係自己加多個6字氣球，生日氣氛up up up！影咗勁多靚相呀！（想知詳細價錢可以留言問我）
海景客房重點之一就係浴室內可以望海景嘅特大浴池啦！我哋仲買咗個泡泡浴球，可以俾兩兄弟玩泡泡浴。浴池大到一家四口齊齊浸浴都好鬆動，而且係對正大海，一邊浸浴，一邊望住個大海，身心都可以放鬆晒，好享受呀！
酒店有兒童遊戲室、Spa Botanica、健身室、餐廳和泳池等設施。（泳池會係4月4日重開。）
酒店嘅「兒童天地」有幼童滑梯、夾公仔機、懷舊遊戲機和圖書等，可以俾小朋友打發時間。
喺酒店休息一陣就搭車去愉景灣南廣場食Lunch 同行街。再帶小朋友去大白灣沙灘公園玩，呢度係香港唯一嘅沙灘遊樂場，有得玩水、玩沙、玩滑梯韆鞦，真心好玩，兩兄弟玩到唔捨得走添！（等我整理好資料再分享俾大家）
玩到黃昏時間我哋就返酒店旁邊嘅玻璃教堂 打卡影相睇日落。
夜晚我哋喺愉景灣酒店嘅「Café bord de Mer & Lounge」食自助晚餐，全海景餐廳用餐環境乾淨舒適，令人坐得好舒服。侍應們都好有禮貌，態度親切。自助晚餐主題係「非一般炭燒自助餐」，酒店特別安排咗大廚喺戶外海濱露天區域即場為大家燒，有炭燒羊排、虎蝦、西冷牛扒、 三文魚等，可以一邊欣賞夜景，一邊享受美食。
室內款式選擇都好多呀！有冷盤、粉麵、海鮮、日式小食、刺身壽司、甜品和多款熟食。飲品有芒果汁、柑桔檸檬水和咖啡奶茶任飲。我同老公食咗好多海鮮，長腳蟹和麵包蟹都好鮮甜，幾正！兩兄弟一人一碗湯粉麵，可以狂食甜品和水果，佢哋好開心呀！
第二朝瞓到自然醒好舒服，我哋預約了9點係酒店餐廳食自助早餐，早餐款式選擇都多，有各款嘅熱食、沙律、冷盤、中式點心、炒伊麵、粥品、炸物、麵包、蛋糕和鬆餅等。弟弟最愛嘅乳酪都有多款口味，食到好滿足。
食飽飽後我哋就去參加酒店嘅「親親馬兒」活動，每人包一份馬飼料，可以親手餵馬仔食嘢，好好嘅體驗呢！
玩完再上房俾兩兄弟係個大浴池再玩多陣水，我同老公就望下個大海景嘆多杯茶，好寫意！
最後當然要去埋Epicland 歷奇王國玩啦！小朋友一次過放電大成功！（下篇會有詳盡介紹）
今次喺「愉景灣酒店」兩日一夜真係好滿足，無時無刻都望到大海景，感覺好放鬆，仲影咗好多靚相添，完全唔捨得離開間房，我哋已經計劃下一個假期再嚟玩多次，下次要去泳池游埋水呢！
—————————————
歡迎連絡安妮媽媽：
Facebook專頁： 安妮媽媽親子日記
IG: @Annie_mama_diary | 安妮媽媽親子日記
E-mail : [email protected]
作者：安妮媽媽親子日記
其他文章：
