| 日期 | 全年適用 |
每逢週末都要諗帶阿寶去邊度玩，今次媽媽提議去港島嘅 薄鳧林牧場 ，爸爸聽到即刻黑人問號～港島有牧場！？薄鳧林又喺邊度？…搵一搵資料，原來 薄鳧林牧場 喺薄扶林，前身係舊牛奶公司高級職員宿舍，而家就無牛唔係真正牧場，係活化咗嘅百年古蹟！
咁入到去有咩玩，有咩睇？今次我哋book咗下晝免費自由參觀，喺入口位已經見到隻icon乳牛模型，阿寶企埋去影相顯得特別細粒，佢仲扮執草餵牛牛；有報道話可以模擬乳牛擠牛奶體驗，不過呢日工作人員未準備好，無得玩。而隔離有隻1:1竹編乳牛模型，聽講係薄扶林村嘅師傅一手製作，呢種文化手工藝真係值得打卡！
薄鳧林牧場 係一座百年古蹟，建築物梗係充滿英式風格，喺外面chok樣擺pose影相都幾靚架！而裏面就有展覽了解舊牛奶公司歷史，又到長知識時間；牧場除咗有得影相睇展覽，仲可以喺接待處捐款拎明信片，交低$100按金仲有得借鐵片拓印，主樓露台提供顏色筆俾阿寶畫畫，呢個位置仲有得望吓博寮海峽嘅景色，即刻心礦神怡！
講多少少～因為 薄鳧林牧場 所在嘅薄扶林村有文化保育，所以接待處可以買啲手工藝製品，7月開始仲有唔同嘅工作坊，可以整蚊香、紥作燈籠、豆漿等~大家仲可以參加收費嘅導賞團，探索薄扶林嘅過去，了解本土文化歷史！
全港27間親子餐廳、遊樂場合集5月生日優惠 2023｜壽星福利大集合
開放時間：星期一至日（包括公眾假期） 10:00-12:30, 14:00-18:00
逢星期三休館（公眾假期除外）
*牧場於指定公眾假期休館，請留意牧場最新公布
地址：薄扶林道141A號
交通：多架途經薄扶林巴士及小巴均可到達
乘搭鐵路可於堅尼地城站 A出口轉23號小巴，5分鐘到薄扶林村落車，過對面馬路行1分鐘即到達
*牧場不設泊車位，最近停車場位於置富南區廣場，步行至牧場約需10分鐘
收費：預約自助參觀：免費
薄鳧林牧場導賞參觀：免費
薄扶林文化地境村落導賞：收費，$280+$10手續費（3歲以上作一位計算）
按此了解更多「薄鳧林牧場」
作者：80後爸B，原文刊登於「阿寶與爸B 生活日常」FB專頁
其他文章：
親子好去處｜去玩去癲嚟OceanPark 海洋公園 半日hea玩行程｜80後爸B
