橡皮鴨 仔闊別咗10年，今年咁好帶埋個fd返嚟呀？當年爸爸媽媽拍拖時同你見過面，今次就帶埋阿寶嚟探你啦！
去到金鐘站已經見到你嘅身影，最吸睛梗係玻璃天幕嗰隻啦，真係好多好多～之後沿住添馬公園行去海邊，除咗見到人山人海，亦可以遠距離見到好大隻鴨仔，再行近啲仲大隻！
今次展覽嘅海旁相比上次開揚好多，唔使好迫都影到靚靚鴨仔相，不過爸爸媽媽星期六（10日）帶阿寶過去時，其中一隻放咗氣，無得打孖影相……
1. 金鐘站L4轉車大堂搭扶手電梯，沿途已經好多鴨仔佈置，抬頭仲見到玻璃天幕嗰隻，上到去出閘就係鴨仔主題E出口，樓梯、牆身、地面都勁多鴨仔架！
2. 海濱公園好大兼有唔同看台，不妨行去唔同位置，無咁迫之餘，仲可以唔同角度影鴨仔！
3. 如果唔介意遠少少望隻鴨仔，可以喺中環碼頭、灣仔會展，甚至搭船去睇！
4. 添馬公園沿途都幾曬，記得飲水擔遮！
作者：80後爸B，原文刊登於「阿寶與爸B 生活日常」FB專頁
其他文章：