夏天成日落雨，天氣又咁熱，所以Blogger 80後爸B 同阿寶出街玩都係室內活動為主，最近去咗喺商場入面嘅 海洋探索體驗館 「浩海立方・探游館」，睇介紹話有1萬呎，相信夠阿寶玩足大半日！
展館門票分2種：2小時體驗 或者 日票全日任玩任睇，而日票仲包期間限定嘅爬蟲特備展覽，我哋唔想咁趕，又想睇多樣嘢，所以決定日票慢慢玩～
呢日係周末，但場內唔算太多人，而展館嘅主題係水母+海洋保育，自然有好多水母可以睇。首先入到去有一大幅水母藝術裝置牆，當中水母缸有唔同嘅燈光效果，至於幅牆就有不斷轉換嘅投影背景，望落去畫面幾靚架，打卡就最啱。行入啲再有幾個水母缸，仲有水母萬花筒、水母隊道等，通通都好啱打卡架！
雖然老實講，啲佈置幾似OP水母館，不過爸爸覺得呢個展館比較有誠意，至少沿途安排導賞員同行，一邊行一邊講解～啱晒阿寶邊睇邊學海洋保育知識！
– 水母喺地球上仲老過恐龍？
– 有邊種水母係食得架？
– 點解膠袋會危害到海龜？
– 世上最大隻嘅水母有幾長？
– 原來水母唔識飽，食得多會飽死！
除咗有得睇，呢度亦有唔同互動體驗，例如喺培育室親手餵豐年蝦畀水母食，又有得戴VR裝置睇片，其中一條片跟潛水員潛水，有鯊魚喺面前游過，感覺幾特別。另外仲有MR體驗，戴另一款裝置拎住手掣「伸手」摸魚，阿寶之前未玩過，覺得幾得意～
至於期間限定嘅爬蟲展覽，會有蛇、龜、手宮、甲蟲等，早啲嘅參觀時間有接觸時段，不過我哋錯過咗，但係阿寶都唔夠膽掂，所以齋睇都得。最後最吸引阿寶嘅梗係兒童遊戲區，有水母滑梯、鯉魚滑梯，爬高爬低，6歲以下啱玩，阿寶可以瘋狂放電。
喺遊戲區隔離有間Café，暫時只有下午茶供應，我哋叫咗3個餐，有炸雞塊、芝士漢堡、豬肋骨，價錢、份量同出面餐廳差唔多，至於味道都唔差，職員仲送多杯飲品畀我哋，唔想周圍走嘅可以喺度食埋。
整體嚟講，爸爸之前都有預期同OP差唔多，不過呢度有導賞員講解，而且可以餵水母+睇VR玩MR，仲有埋遊戲區畀阿寶放電，感覺已經好唔同。當然，一家人嚟玩買日票都唔算平，爸爸見到有平日有限量半價2小時體驗，比較之下覺得性價比高啲。另外，呢度由港鐵站行過嚟都幾方便，經商場天橋，沿途有遮頭，可以算係一個落雨天好去處。
地址：荃灣楊屋道88號8樓
交通：港鐵荃灣西站步行約10分鐘
更多資訊：「浩海立方・探游館」網站
作者：80後爸B，原文刊登於「阿寶與爸B 生活日常」FB專頁
更多親子玩樂好去處：
