| 日期 | 全年適用 |
尖沙咀有好多嘢啱小朋友玩，今次 Blogger 80後爸B 帶阿寶去咗一座免費入場嘅互動展館，有嘢學有嘢玩，仲有得打卡+拎禮物，喺周末下晝去都無乜人，唔使同人逼！
展館分為室內兩層+戶外花園，主題係教育食物環境衛生，有各類互動遊戲、展板、模型；其中地下嗰層有幅互動投影牆，將髹咗顏色嘅圖案紙放入投影機，紙上面嘅圖案就可以展示喺幅牆上，而圖案可以揀清潔工人、垃圾車、洗街車等，阿寶見到牆上有自己髹嘅畫郁嚟郁去，覺得新奇又有趣！
至於地下嘅盡頭係迷你影院，有唔同嘅片畀我哋選播，雖然啲片係關於衛生教育，但都有睇頭，其中一套叫《阿德英雄傳》嘅動畫，講清潔龍阿德vs污糟龍吳德嘅故事，有劇情、有特效，又幾好睇喎～阿寶同爸爸媽媽都坐定定睇。
至於2樓有更多展板+模型，內容講食物安全、防治蟲鼠、街市公廁、滴水問題、健康生活等，不過阿寶仲未識睇字，唯有望吓模型，篤吓啲mon，再加上爸爸媽媽講解，叫做學到啲嘢。
我哋行完室內就出去戶外花園，放咗歷年嘅清潔香港大使俾人打卡，除咗有而家嘅「清潔龍阿德」，仲有平安小姐、垃圾蟲、清潔小姐…除咗第1代清潔龍，其他爸爸媽媽都只係書上面見過。
呢座展館阿寶可以睇+玩外，場內仲有得扱印仔，儲齊換小禮物；咁啱我哋仲夠鐘聽公眾衛生講座，聽完可以攞紀念品，今次就拎到清潔龍阿德公仔。
介紹返～呢度係衞生教育展覽及資料中心，位於九龍公園清真寺隔離，一級歷史建築嘅紅磚建築物，好易認！
地址：尖沙咀九龍公園S4座
交通：港鐵尖沙咀港鐵站A1出口、巴士九龍清真寺站
開放時間：星期二至五、六08:45-18:15
星期日11:00-21:00
逢星期一、四及公眾假期休息
公眾衛生講座時間表：按此
更多資訊：「衞生教育展覽及資料中心」網站
作者：80後爸B，原文刊登於「阿寶與爸B 生活日常」FB專頁
更多親子玩樂好去處：
荃灣好去處｜位於商場 海洋探索體驗館 睇水母+爬蟲動物+任玩兒童遊戲區｜80後爸B
