麥當勞主題公園 | 今次係媽媽第一次自己一個人帶豬仔包北上玩，所以㨂咗比較近深圳地鐵沿線嘅地方去玩，深圳華僑城嘅「O·Power文化藝術中心」，由麥當勞與國際著名設計師Verdy合作，創造名為「BFF麥麥小鎮 」嘅 麥當勞主題公園 ，地鐵號綫「僑城北站」B出口，往後直行5-7分鐘就到，非常方便。
一入到「 麥麥小鎮」，已經見到麥當勞叔叔、漢堡神偷、滑嘟嘟同小飛飛迎接我哋。豬仔包未打卡已經急不及待衝上樓梯去玩了。「 麥麥小鎮」分為「戶外打卡區」與「 室內開心劇場」2個區域。
室外部分無需預約，室內部分則需要提前在「麥當勞」微信小程序或麥當勞APP預約，分為09:00-15:00，或15:00-21:00兩個時段，沒有預約亦可現場排隊等待入場。由於去到嘅時候烈日當空，媽媽豬仔包決定先進入室內嘅部分。入面有打卡區，免費印畫，即影即有拍照，仲有「麥麥小鎮手冊」售賣區。
麥麥小鎮手冊
我哋轉去買「麥麥小鎮手冊」，一套人民幣89.9，除咗手冊仲有一張換領「麥麥小鎮派對餐」嘅coupon。只要根據手冊内各區任務，完成便可找在場工作人員蓋1個印章，集齊指定印章，可以換領禮物，集齊6個印章仲可以抽獎，有機會抽取麥麥顯眼包同其他周邊商品。
6個集章點包括：
甜筒很滑板廠
薯條大道
漢堡工廠
蘋果樹廣場
麥當勞叔叔長椅
室內開心樂園劇場
生日派對屋
我哋周圍打卡影相攞印章，玩得非常開心。小朋友印齊6個大印章，就會變成一幅彩色嘅麥麥小鎮畫，豬仔包好鍾意，第一次係印響手冊，第二次玩就係工作人員派嘅卡上面印，估唔到簡單幾個印，印好又真係幾靚，小朋友好有滿足感。極速完成任務就回到「麥麥兌奬處」換領禮物同抽獎，雖然只抽中磁石貼，但豬仔包同樣開心。
戶外園區除咗有好多集章同打卡點外，仲係一個兒童遊樂場嚟，有長滑梯、繩網、小搖椅等。媽媽好欣賞園區設計，要上去玩長滑梯，可以走長樓梯、旋轉樓梯、繩網或攀爬架，咁多方式可以上去，不單可以迎合不同年齡小朋友需要，仲可以比小朋友不同排戰，以不同方式去玩。 豬仔包淨係玩長滑梯都玩到唔捨得走，極速放哂啲電。其實除咗免費區域，仲有自費區域，包括旋轉木馬、蹦蹦雲同小鎮淘金，但媽媽覺得性價比不高，我哋就冇玩。
玩完一輪，係時候食嘢補充吓體力，現場其實有麥麥餐車售賣雪糕同飲品，但我哋買麥麥小鎮嘅手冊時係有一張「麥麥小鎮派對餐」嘅coupon，當然要兌換咗先。
兌換地點係「天鵝湖麥當勞餐廳」，位置響麥麥小鎮對面商場，行5-7分鐘就到。不過餐廳裡面人山人海，所以都要等吓位。 餐券可以兌換一份麥樂雞開心樂園餐，再加一份四宮格小食盤，真係食到飽飽，有得玩有得食仲有禮物，真係好抵。唯一係餐點唔包飲品，只有一盒兒童餐嘅牛奶，我哋要自己排隊再買飲品。
BFF麥麥小鎮
活動日期：2023年11月29日(週三) – 2024年1月2日(週二)
位置：O•POWER藝術文化中心 深圳南山區華僑城香山東街19號
門票：免費/需提前在「麥當勞」小程式預約
交通：地鐵2號線僑城北站B出口步行
作者：豬仔包の開心日常
其他文章：
全新 室內遊樂場 ｜Sparkles Playhouse 低至$50/位 觀塘港鐵站1分鐘步程 120分鐘暢玩波波池/沙池/發光鋼琴滑梯/彈床
