| 日期 | 全年適用 |
媽媽同豬仔包一向都好鍾意參與工作坊，今次我哋衝出香港，第一次北上嘗試參加整嘢食嘅工作坊。今次工作坊地點係深圳「 西貝莜面村 」餐廳（石廈時代廣場店），由於活動係喺朝早9:30開始，所以媽媽超早就帶住豬仔包過關去玩。我哋去到餐廳，已經見到寫住小朋友名嘅牌，知道自己坐邊之後，就去洗乾淨手，坐定定等開始。
「西貝莜面村」嘅親子工作坊有好多種類，我哋參加嘅係「莜面魚魚」。導師喺中間示範如何將麵團搓成「魚魚」，跟住我哋就喺自己位動手試做啦！雖然媽媽覺得條「魚魚」係似條銀針粉多過似條魚，不過小朋友就好投入整得好開心。估唔到一舊小麵團，足夠我哋將整好嘅「魚魚」鋪滿整個蒸籠，真係玩咗好耐，但豬仔包一時話要整魚爸爸，一時話要整魚BB，完全唔覺得攰！
當所有人都完成「莜面魚魚」等蒸嘅時候，導師就化身做魔術師表演魔術，雖然魔術係BB級，仲有年紀大少少嘅小朋友睇到破綻，但氣氛其實好好，豬仔包睇得好開心！表演完魔術之後，所有小朋友就同導師去到餐廳外玩集體小遊戲，然後就返回餐廳等食。等食期間，導師仲頒發奬牌同小禮物俾小朋友添。
等咗好耐，終於等到「魚魚」出籠，「魚魚」係可以選擇配磨菇湯或者蕃茄酸湯一齊食，食自己整嘅「魚魚」當然特別好味啦！工作坊完咗之後，我哋留低喺餐廳食嘢，嗰度有本兒童專用嘅餐牌，豬仔包可以自己㨂鍾意食嘅嘢。另外，我哋仲見到餐廳有整「莜面窩窩」嘅示範，豬仔包睇完仲話下次要試整添。
後感：媽媽覺得活動技巧簡單，好適合年幼嘅小朋友玩，而且費用只係人民幣39元，但就送番一個價值33元嘅兒童餐券，仲有奬牌同一包麵粉俾我哋返屋企自己再整過，再加上我哋整嘅「莜面魚魚」響餐廳真係有得賣，感覺好似免費玩一樣，非常推介，唯一係時間好早，同埋唔係間間分店都夠人開班。
另外大家要留意，送嘅兒童餐只能兌換價值33元那款，媽媽原先意為可以選擇其他款式兒童餐，扣掉33元補差價，但實際是不行的，個送嘅兒童餐唯有留番下次再去食吧！
報名方法：在WeChat，輸入「西貝莜面村」找到官方號，點按「服務」，再按「西貝親子活動」，找到喜歡的活動按進去報名，要留意日期和名額，店舖可切換選擇的。
圖文獲「豬仔包の開心日常」授權轉載
更多親子好去處：
深圳 Costco 及 山姆 超市旅行團優惠 ｜純玩2日$468 到訪Costco/送全球通用會藉/住五星酒店/包自助餐
