| 日期 | 全年適用 |
日本是許多香港人親子遊的目的地，沖繩都是其中一個熱門選擇。居日Blogger「彤彤與昕昕沖繩手記」為大家推介沖繩那霸市區的必去景點及親民價美食廣場，有齊食買玩資訊，一家人到訪沖繩時不妨參考！
富二代一直被爸爸灌輸「家中欠很多債」?
嚟到沖繩大家落機嘅第一站會去邊度呢？有啲朋友仔玩選擇第一日喺那霸市區玩，有啲朋友仔就會選擇直上名護最北邊由上面搵返落嚟。今次為大家準備那霸市區好去處介紹：
國際通大街兩邊都有好多唔同嘅特色商店，如果落雨仲可以行入和平商店街，有蓋嘅室內商店行吓。如果想買手信，呢度都算好齊全，價錢就大同小異，有啲喺度嘅手信，商場或者商店都未必買到，所以如果睇啱都可以入手。而且四周都有好多特色嘅商店，如果認真咁樣行真係行成日都唔夠呀。我哋路過一間番梘鬼口水嘅店舖，可以用沖涼嘅時候玩，玩完再沖涼，好得意呀！
其中有一個我覺得必訪嘅商店——滿滿芝士拉絲10円大餅 ，好多沖繩人當地人介紹，我哋親身食咗都覺得好好味！拎上手真係熱辣辣，外面脆卜卜，裏面芝士流心，外型係10円造型，打卡一流。不過價錢就唔係10円啦，價錢係500円。
拉絲芝士大餅地址：Google 地圖
行到攰可以去隱藏喺國際通大街嘅地下美食廣場填肚。美食廣場裏面仲充滿特色日本小燈籠，同埋勁多唔同款嘅餐廳，韓日台美食、鐵板牛扒、拉麵、串燒、居酒屋、酒吧、刺身、台式小食、流水麵、飲料店、生蠔bar應有盡有。
喺國際通餐廳好多嘅價錢都會比較貴，一來遊客區，二來啲高級貨品相對係會貴啲，但係入到嚟終於返咗平民區！（我偷偷地影咗幾間舖頭嘅Menu俾大家睇）不過就算唔食嘢，其實入嚟行過圈都正㗎，入面嘅裝修同埋裝飾都好特別。
波上宮神社位於那霸區，所以交通比較繁忙，停車基本上要搵有料停車場。如果揸車嚟嘅，建議你排隊等波上宮嘅停車場，一來唔使錢（無料），二來出面要俾錢嘅都好難搵位，三來神社唔算大，啲人參拜完就會走，所以排隊等候嘅時間唔會太長。
不過入到神社都已經要開始排長龍入去，好彩都唔算等太耐，大家都係準備好錢幣，去到前面就直接參拜許願，所以好快。
如果你需要買守護符及繪馬、新年裝飾等亦都係需要排長龍，如果大家想避開繁忙時間可能平日嚟會比較好啲，當然過咗正月新年之後就唔會再有呢個情況。
奧武山公園其實唔講都大把人知，入面有齊中幼童區，適合年紀細大嘅小朋友都啱玩，同埋仲有一個沙池仔。滑梯係普通，唔係滾輪，唔使驚sir到pat pat痛，而且仲好跣添，我親身試sir咗幾次覺得好好玩。
奧武山公園有好多個停車場，泊個近少少嘅唔使行咁遠，不過呢個停車場就比較細，唔係泊到咁多車，但係平日嚟玩多數都有位。
圖文獲「彤彤與昕昕沖繩手記 」授權轉載
其他好去處：
