| 日期 | 全年適用 |
平時喺playhouse扮醫生、牙醫、獸醫就扮得多，扮中醫師真係第一次，仲要係喺真嘅中醫館度玩！今次我哋係跟西九龍共學北上去深圳當個小小中醫師，一去到中醫館，我哋就被安排喺活動室，小朋友可以換上中醫袍，個個都好得意！
導師先介紹中醫館歷史，然後就帶我哋參觀中醫館各個設施同產品，之後有中醫師進行把脈教學體驗，最後回活動室就進行問答遊戲。
小朋友喺問答環節當中可以認識8種藥材，入藥究竟係植物嘅邊一部分？有咩功效？全部都可以了解到，不過多數都係小朋友舉手，家長代答，由於有小零食做奬品，小朋友個個都好踴躍舉手！
認識完藥材，就到自製中藥香包，香包嘅材料係人參果不同部分，小朋友要用秤去拿指定重量嘅藥草，然後放入袋內，中藥香包就完成。豬仔包第一次用秤，起初都手忙腳亂，後來媽媽指導一下，就越做越好，最後都成功秤到需要嘅份量放入香包裏面，製成中藥香包，香包仲有防蚊同去濕等功效，豬仔包話去戶外玩要提佢帶埋去。
整完香包，就派發奬狀同大合照，之後就到產品試食，蜜糖多士係最受歡迎嘅試食品，忍唔住食完一塊再一塊。除咗試食體驗，仲可以有醫師一對一健康咨詢同小兒推拿體驗環節，豬仔包話按摩，好舒服，舒服到唔想起身，體驗時間唔夠喉，叫媽媽返屋企幫佢再按。
活動有得食、有得玩、有嘢學，仲有禮物，豬仔包話好開心，我哋其實仲有其他北上打工體驗，之後再同大家分享！
其實內地團，我全部都係跟西九龍共學去玩的，佢哋會喺群組不定時組織活動一齊玩,接洽内地旅行社搞活動，唔同職業配搭會唔同錢。如果自組夠30人會包車去玩，一次會體驗兩個活動。
中醫配麥記 RMB510，一大一小包車，有粵語老師帶隊，包關口來回，同每人一支水。
圖文獲「豬仔包の開心日常」授權轉載
更多親子好去處：
