| 日期 | 全年適用 |
珠海親子遊 ｜復活節公眾假期4天，不過我哋淨係得頭2日可以去玩，要諗一個地方去2日1夜，最後就決定「港車北上」珠海海泉灣*。
因為驚多人，我哋7:45am已經喺屋企出發，11點己經喺白藤頭食海鮮。1X年前同活躍爸去過，好似都覺得好普通。今次，我哋係住最新果間帆酒店，開咗半年左右，只係book最普通嘅房間（有啲房係有滑梯、私人溫泉），我哋住普通房都覺得好ok，性價比非常高！酒店廁所竟然係電子廁所（對於在家用開電子廁所，我哋係勁加分），全部潔具係用Hansgrohe。
重點：一家四口酒店房一間+遊樂場+動物園+溫泉+早餐=¥1250（矮過120cm係免費入場，所以細佬乜都唔洗！）
酒店內有一playroom，免費任玩，環境都幾好、另外，有一個室外嘅遊樂設施都幾大。無冷氣，不過有蓋。
至於早餐，都真係應該係我哋喺大陸食過最好嘅三甲！勁多選擇，有芝士、有cold cut，沙律都有好多款，而且早餐竟然有泰式青木瓜沙律。
另外，自駕嘅人士可以免費泊車；無自駕嘅，園區內有golf車免費載客人。
由帆酒店行去海洋溫泉係好近，應該5分鐘內，我哋去完動物園，食完晚飯，就去浸溫泉。為咗滿足啲仔好想搭Golf車，所以就由酒店搭去海洋溫泉，N年前，我和活躍爸嚟過浸溫泉，今日再去，其實同N年前唔係好大分別，舊舊地，當然，同日本浸嘅感覺完全不同。不過海洋溫泉都好多唔同池選擇：
✅海洋溫泉有個位置係for小朋友，有滑梯。啲小朋友當嬉水池玩；
✅有個位置浸住溫泉睇戲，都幾正；
✅有好多不同味道嘅溫泉，例如: 紅酒、綠茶、咖啡等。我覺得當歸味最逼真；
✅有得扮喺「死海」浸
浸浸下口乾，仲有免費紅棗茶、薑茶、鹽水任飲。
成個酒店package包埋動物園和遊樂場。
先介紹動物園———小矮人萌寵樂園。環境好好，帶小朋友一流，由於我細仔係草泥馬愛好者，所以係必去！
雖然包咗入場費，但裏面有不少自費項目。由於package太抵，所以即使要額外比錢，都覺得勁抵。例如，買紅蘿蔔餵動物¥10、買奶餵豬¥20（有手套/夾提供比小朋友餵動物）。啲仔仲玩埋騎馬。2個仔玩咗騎馬體驗¥138/10分鐘，個馬圈好大，同之前普通兜一個圈唔同。我哋大概逗留咗喺動物園2.5小時，由於我哋住喺帆酒店，所以喺海泉灣渡假區內泊車都係免費。
第二日早上食完早餐，就去神秘島遊樂場玩。地方好大，又非常少人（租電動車駕好啲，我行到腳軟），基本上都唔洗排隊，除咗碰碰車。挖泥機喺內地好多地方都要額外收錢玩，不過神秘島係免費任玩，2個仔玩咗N甘多次！佢哋應該最鍾意玩呢個挖泥機！
每人加¥20，可以入雪世界（¥20已包外套、鞋套），雖然裏面細，都係玩下滑梯，不過¥20/人，好抵玩。
呢度既有無動力既嘢玩，又有機動遊戲（啱大童嘅刺激機動遊戲），加上超級少人，所以感覺上比上次去嘅珠海星樂度更正（不過神秘島玩踩車要比¥25/人，星樂度是免費的。）
*由港珠澳珠海口岸開車大約1小時
圖文獲「有個過度活躍媽」授權轉載
更多親子好去處：
珠海親子遊 ｜ 星樂度星奇塔無動力世界 由早玩到晚 5大遊樂設施推介
港車北上親子遊 ｜佛山Snoopy主題樂園 逼真呈現漫畫主題世界 騎馬/開挖掘機/餵小動物 適合初小及幼稚園小朋友
