高雄淨園農場親親水豚/餵天鵝近距離觀賞飛機升降+坐小火車

日期

全年適用

平時去農場玩，主要都係親親小動物，不過今次我哋台灣高雄之旅，除咗睇小動物之外，仲可以一邊食，一邊近距離觀賞飛機升降！「高雄淨園農場」係一座結合小港機場嘅景觀咖啡廳、動物園、親子遊樂設施及有野餐露營帳篷嘅複合式休閒農場。

由於位置非常近小港機場，我哋去嘅係旅程最後一日，所以直接帶埋行李，可以玩到最後一刻先離開！一入場就先購票，平日去門票部分金額可抵折，之後就去旅客服務中心寄存行李，係免費的。

之後我哋就開始親親小動物，一開始係喺扭蛋機買魚糧餵魚，估唔到個池除咗魚，仲有天鵝，同樣會食魚糧，仲會走埋上行人路添！之後再買牧草飼餵水豚，豬仔包同朋友仔一開始都有少少驚，後來知道原來水豚視力唔太好，只要行遠啲就唔會追住，所以慢慢都夠膽近距離餵水豚，真係好得意！

園內仲有紅鶴、草泥馬、梅花鹿等，不過當日好熱，全部都想瞓覺，職員話買飼料餵佢哋就會起身。再行入啲，仲有全世界最大嘅鸚鵡「紫藍金剛鸚鵡」，羽毛顏色好靚。職員話另一邊仲有馬可以睇，點知一行出大草坪，除咗見到舒服嘅野餐露營帳篷區之外，遠遠仲見到兒童遊戲區，兩個小朋友當然急不及待衝去玩啦！

「兒童遊戲區」內有單車、滑梯、大韆鞦、沙池、幼兒玩具、釣魚遊戲等。玩釣魚遊戲可以喺櫃枱免費借工具，玩沙用具就需要購買或自攜。此外，憑門票每人仲可以坐一次小火車，不過平日每小時才開一次，趕飛機的便要留意一下時間，建議先玩小火車才玩其他。

玩完一輪，大家都又累又餓，係時候食嘢醫肚，場內其實不止一間餐廳，但我哋其中一個重點係睇飛機升降，所以就必須到「空港咖啡店」。餐廳提供飲品、火鍋、義式套餐同鬆餅等等，真係早、午、晚或下午茶，甚至只係杯咖啡，都得傾吓偈都得。以台灣來說，餐飲價格確實是比較貴，但味道同賣相我哋都好滿意，仲可以邊食邊睇飛機升降，所以仍是非常推薦，飛機飛過大人小朋友都好興奮呢！