| 日期 | 全年適用 |
有間 親子餐廳 媽媽bookmark咗好耐，適逢假期又出開北角，一於帶豬仔包去朝聖一吓！呢間 親子餐廳 叫「 Cakebearbear」，原先係網上小店，主打製作各款3D熊仔、造型芝士蛋糕，再配上客製化嘅字句或衣服造型；之後由只賣蛋糕轉為Cafe形式經營。
Cafe以熊啤啤做主題，店內裝修以粉色系裝潢為主，除咗熊仔造型蛋糕、窩夫、芭菲同刨冰、甜品外，仲有牛扒、各式意粉、蒲燒鰻魚飯等菜式，都幾多選擇。豬仔包雖然係男仔，但入到餐廳見到咁多熊仔都心心眼，係咁同啲公仔互動打卡！
由於豬仔包話唔太肚餓，所以我哋點咗一個午餐，加錢升級特式飲品，再加一個甜品。卡邦尼温泉蛋意粉，火腿、磨菇同洋葱份量好足，醬汁非常濃郁，意粉軟硬適中，配埋温泉蛋真係好好味！特式飲品「千語星晨」，是由蝶豆花、橙汁加菠蘿汁配搭而成，可以看得到分層，上面仲配埋主題熊仔，賣相一流。味道酸酸甜甜，食完濃味嘅意粉再喝特飲，份外覺得清新順口，啱晒唔鍾意太甜嘅朋友。
由於甜品種類非常多，我哋都㨂咗好耐，先決定點芝士慕絲熊仔蛋糕。呢個可愛睡眠造型嘅熊仔蛋糕，一上枱已經非常吸睛，打卡一流。味道方面，慕絲口感軟滑，芝士味非常濃厚，啱晒喜歡芝士嘅豬仔包同媽媽。原先話唔肚餓嘅豬仔包食得比媽媽仲多，食物食得又睇得，Cafe環境仲相當舒服，我哋平日去人流不多，真係可以慢慢嘆！
地址：北角炮台山電氣道233號城市花園商場第10座地下G45號舖
電話：6130 4423
營業時間：星期一至日11:30 ～ 22:00
圖文獲「豬仔包の開心日常」授權轉載
更多親子好去處：
露營主題 親子餐廳 ｜室外巨型露天帳幕+自己動手燒棉花糖 小朋友有新鮮感
