| 日期 | 全年適用 |
今次台北親子遊，我哋去咗「石碇許家麵線」體驗「手工麵線DIY」，活動非常受歡迎，6歲以下小童係免費的，相當抵玩。到達目的地，第一時間就去報到，然後付款，之後就坐定定聽專業導覽員講解麵線製作。
原來製作麵線都有好多步驟，壓麵、割麵、滾麵、繞8字、拉麵、甩麵等，真係好考功夫！聽完講解，就開始我哋第一個體驗「手作麵線DIY 」，每2人一組，指導員先示範如何用「拉、甩、放」3個步驟去製作麵線，然後我哋用一條小麵團練習一次，之後就正式開始認真地製作我哋嘅麵線啦！
原先睇落唔太難，但到真係整嘅時候，做出嚟嘅麵線同指導員做的真係有啲距離。勾住麵線嘅棒真係唔輕，對小朋友嚟講更加有難度，不過當指導員跳起幫我哋甩咗兩下，已經靚哂，曬麵線時指導員叔叔仲幫忙影靚相添！
整完麵線，我哋就可以抖一抖，周圍影吓相，買吓手信，等第2個環節「 流水麵」開始。呢個體驗大約15 – 20分鐘，5人以上一齊訂購，就可以有獨立水道。一開始先有山泉水流出，大家即時好緊張。雖然豬仔包喺最尾，唔好以為好慘會冇得食，其實大家一不留神，麵線就會流走，所以豬仔包仍然有好多麵線等佢夾！當夾咗一輪，大家開始冇咁雀躍嘅時候，突然又有唔同顏色嘅麵線出嚟，大家又興奮起嚟，繼續努力夾！夾！夾！，到最後跌出提子，就知道體驗完結啦。
流水麵清爽、Q彈嘅口感，配合埋醬汁真係幾好味，相信夏天食會更加透心涼。由於流走嘅麵線非常多，我哋一行人就將麵線帶到樓上嘅餐桌度繼續享用，當時天氣好凍，店家有提供免費薑母茶，真係非常貼心。樓上除咗餐桌之外，仲有少少兒童遊樂設施可以免費玩。我哋食飽之後，仲可以每人有一束專屬於自己嘅麵線帶回家添，真係大滿足！
今次嘅體驗，大人同小朋友都玩得開心，食得開心，唯一係位置比較偏僻，包車或開車前往會較好。台灣許家麵線官網、Klook同Kkday都有相關活動可預先購買，仲有葱油餅DIY可配搭，記得預約啊！
地址：新北市石碇區烏塗里四分子三號
電話：02-26633004
營業時間：9:00~16:00，週二公休
網址： www.facebook.com/sdnoodles/
圖文獲「豬仔包の開心日常」授權轉載
更多文章：
宜蘭 4日3夜行程全攻略 親子溫泉酒店/近距離水豚互動/鉛筆製作工作坊｜台灣親子遊
