| 日期 | 全年適用 |
夏天熱辣辣，行陣街都已經成身汗，一於玩雪降吓溫先得！今次我哋去嘅「海昌·樂漫冰雪王國」，係華南地區首個以東歐風格爲主題嘅冰雪樂園，打卡真係一流，樂園位置喺深圳寶安區大型商場「海雅繽紛城」内，由深圳灣搭的士去都只係20分鐘，非常方便！
樂園佔地面積約 40,000呎，樓底約10米高，共分為5大主題區域，包括：嘉年華派對、霧凇森林、冰川山脈、極地大陸、冰雪城堡。未入場前，門口售票處同入口都佈置得好有嘉年華氣氛，真係忍唔住要打個卡先入場玩！進場後，職員會免費提供雪服同鞋套比我哋，之後就可以喺暖區換上裝備，準備進入冰雪世界！
一進入冰雪世界，大家都俾眼前嘅冰雪城堡吸引，好似入咗個冰雪小鎮一樣，不過更加吸引嘅，係場內嘅玩樂設施。我哋第1個玩嘅就係「雪國列車」，大人或者小朋友都玩得，列車好似BB過山車咁喺路軌上行走，車速唔算快，但喺冰天雪地玩特別開心，玩完一次，豬仔包已經話要再玩。之後，我哋就轉戰「旋轉冰滑梯」，滑梯共有3種不同強度及長度，豬仔包由最短嘅開始試，直至試咗最高嗰條之後，就唔再玩其他，話最高係最刺激最好玩。最高嗰條滑梯確實最多人排，連大人都玩埋一份，旁邊見到有「雪國飛索」，不過唔知係咪我哋係平日去，所以冇開，唯有下次再玩過！
喺最長嘅冰雪滑梯出口旁有間雪屋，入面有個好得意嘅遊戲「雪地轉轉」，小朋友坐喺輪軚水泡泡上，職員啟動裝置後就會好慢咁轉吓停吓，因為地面係有少少高低，所以係會有少少上落山嘅感覺，水泡有機會撞埋一齊，小朋友一撞到就係咁笑，仲試過玩完一轉，好玩到冇一個小朋友肯落嚟添！雪屋旁邊係「旋轉木馬」，先頭意為係唔郁，只係坐上去打卡，但當豬仔包坐上去時，職員就主動開啟「旋轉木馬」，真係好驚喜！
整個場地唔算好大，但勝在小朋友鍾意玩嘅都有齊，爸爸媽媽唔使追到氣咳之餘，仲全部可以一齊玩，真係好正！不經不覺，90分鐘飛咁快就過，我哋臨走經過廣場先發現係一個「飄雪廣場」嚟，好多雪全天飄落嚟，真係好似置身真嘅雪國一樣，我哋真係發現得太遲，下次一定要再去過玩個夠。
溫馨提示：場內只有-5度左右，除咗手套、耳罩必備之外（可現場購買或自備），我哋未着雪服前都喺裏面着咗長袖衫同長褲，咁就會暖好多。不過想暖，最有效方法就係一齊玩，企喺度睇住小朋友玩就會好快變雪條架！
地址：深圳市寶安區新安湖社區建安一路99號海雅廣場4層L430號商鋪
交通 : 深圳地下鐵12號線新安公園站C1 出口步行820米或轉穿梭巴士
營業時間：週一至週日10:00-22:00
圖文獲「豬仔包の開心日常」授權轉載
更多親子好去處：
參觀台北著名麵線工場 親子手工麵線DIY＋即食流水麵｜台灣親子遊
高雄淨園農場 親親水豚/餵天鵝 近距離觀賞飛機升降+坐小火車
