大嘥鬼秘密基地 ｜ 識「碳」館 了解「碳中和」 免費預約參觀

大嘥鬼喺灣仔開咗個秘密基地？於是Blogger「豬仔包の開心日常」媽媽決定帶豬仔包去做個減碳特工，一齊去 識「碳」館 探下大嘥鬼。

甚麼是 識「碳」館 ？

– 前身係舊灣仔郵政局，館內除保留咗舊灣仔郵政局嘅原有建築風格之外，仲保留咗部分富有歷史價值嘅擺設

– 現以「碳中和」為主題，透過多元化嘅互動體驗同教育元素，以互動遊戲、講座同環保工作坊等方式，希望提高公眾對碳中和嘅認識

識「碳」館 共分為4個部分，包括：

1. 大嘥鬼禮賓室

2. 識「碳」探索室

3. 大嘥鬼辦公室

4. 識「碳」小花園

我哋去到點完名，就由職員帶我哋由正門進入館內，喺樓梯都已經見到大嘥鬼，入到去仲有隻更巨型大嘥鬼等緊我哋！

首先，我哋喺「大嘥鬼禮賓室」坐定定，之後就由導賞員同大嘥鬼向我哋介紹從衣、食、住、行4個範疇，可以點樣改變生活上嘅小小習慣，就可以實踐到低碳生活，而「減碳特工」嘅任務，就係協助香港喺2050年前實踐「碳中和」。

之後，我哋就進入「識「碳」探索室」，進一步認識碳中和嘅大策略，當中有影片、互動遊戲，仲有導賞員俾我哋嘅小任務等。遊戲仲會申延去到「識「碳」小花園」，可以認識回收重用同升級再造知識。

最後，我哋就去到「大嘥鬼辦公室」，大嘥鬼又坐喺裏面等我哋。導賞員先俾明信片我哋，話寄明信片俾大嘥鬼，佢會回信。之後工作坊係填色活動，有好多圖畫可選，畫完就逐一講吓畫嘅構思，導賞員就派紀念品俾小朋友。

我哋見到枱面有環保燈，窗邊亦有風車等裝置，大家都好想整，不過導賞員話因為某啲工作坊年紀太小參加會有危險性，所以每次都係按大多數參加者年齡去決定工作坊内容，係隨機的。

導賞團係免費預約，小朋友可以學到有關「碳中和」嘅知識，仲有得玩、有禮物帶走，真係好適合一家大細去。活動前仲會有工作人員同我哋確認預約，同教我哋點樣去 識「碳」館 ，真係非常窩心，唔駛驚唔識去。

識「碳」館

地址：灣仔皇后大道東221號
開放時間：星期二至星期日 10:00 – 18:00（除農曆新年初一、二外)
　　　　　星期一、農曆新年初一、二：休館
　　　　　農曆年除夕、冬至、平安夜：10:00 – 16:00
查詢電話：9100 9590
費用：免費
個人及團體預約：按此

圖文獲「豬仔包の開心日常」授權轉載

更多親子好去處：

室內遊樂場 ︱奇妙水世界遊戲室 「水底」潛望鏡／大海星軟墊／殺人鯨滑梯︱80後爸B

毛公仔體驗工作坊 ｜1小時簡單DIY 毋須針線縫紉技巧 包5選1公仔公仔／衣服／頭飾／道具