深圳親子遊 ｜小朋友開學後，想周末北上短線遊？可以到呢個福田搭2個站直達、2023開幕親子主題酒店，樓下有4,000平方米兩層主題探索館，有得玩VR、親子電動車、室內遊樂場，另有大型商場美食，小朋友即刻去放電！
放假親子去邊好？
酒店唔使日曬雨淋地鐵直達，酒店樓下就係兩層主題探索館，有個小型商場仔，多間食肆選擇，唔怕冇嘢食，而且酒店連接地鐵站，去邊都方便！
四星親子酒店2023全新開幕，熱門100平方米親子主題房，有滑梯波波池，房間已經成個遊樂場咁，有9間主題房，不過真係超full。我哋訂唔到，所以訂咗最基本嗰房型「高級大床房」，一晚只係$5xx好抵住，25平方米都好闊落，係最愛嘅木地板！
兒童不加床免費入住，仲可以免費加BB床，提供兒童拖鞋牙刷，早餐120cm以下免費，酒店套票包咗迷你吧、自助宵夜。
位置地鐵直達好方便！全程唔使日曬雨淋，性價比高！唯一缺點係隔音一般，我哋房間對住馬路，夜晚聽到啲車聲，不過住一晚唔大影響，因為大家玩到好攰瞓到隻豬咁。
酒店樓下嘅4,000平方米兩層兒童主題探索館，6大主題區，人仔149一大一小就可以玩足全日10個鐘，有樹屋、彈跳迷宮、角色扮演、煮飯仔、消防車、玩水、運動、倉鼠跑步圈、幼兒區、冰世界等……過百款設施超多嘢玩！無限次進出，食飽又入去玩！真係超級抵玩放電！
如何前往：我哋西九龍搭高鐵14分鐘就到高鐵福田站，行去地鐵站2號線往赤灣方向，搭2個站到景田站，B出口直達婦兒大廈上28樓酒店大堂
深圳兒童探索館：地點就係酒店地下，酒店住客免預約入場，大小必須穿防滑襪，現場購人仔5蚊，逢周一休館！
文章獲初初媽媽 ChochoMama授權轉載，內容或不時更新，詳情請向店方查詢。
更多親子好去處：
深圳好去處｜一站式購物商場內的超大型遊樂場 一個價錢全日任玩︱初初媽媽
