| 日期 | 全年適用 |
香港人有假期就「返鄉下」度假，一年四季都有不同美景的 富士山 都是港人喜歡的旅遊熱點。如果可以對住富士山浸溫泉，諗起都覺得好愜意！Blogger「Lazy Li’s｜你是•李氏」早前帶一歲大的BB去日本旅行，就入住了一間Baby Friendly的河口湖溫泉度假酒店，她說無論房間景觀、餐飲定酒店服務都是超五星級的享受！熱門房型仲要好快fully booked，有興趣的爸媽記得要提早預訂！
終於有時間分享Lisboy嘅第一次東京之行，知道帶住一歲BB去旅行，準備嘅嘢好多好多，包括証件、BB清潔護理用品、衣物、醫療用品、BB安撫用品等。準備充足之餘，行程設計亦不宜太趕，住宿仲要乾淨得來Baby Friendly，媽媽我今次膽粗粗計劃去富士山，所以揀咗呢間好多好評嘅富士河口湖溫泉度假酒店「Kukuna風之露台」，入住體驗極驚喜，親子旅行大力推薦！
酒店嘅特色是每一個客房都有露台，一家人坐喺房間/露台已經望到大大個富士山！感恩當日天朗氣晴，足不出戶都見到白雪雪嘅雪頂每。每間房都超過300呎，空間感十足，Lisboy喺房內跑跑跳跳放電真是啱晒。房內設備同五星酒店一樣，最特別嘅係酒店有面膜提供。
呢間酒店價錢唔算平，但性價比好高，一泊二食（即係一晚住宿包早、晚餐）。晚餐可揀日式鐵板燒或西式加半自助餐，我哋想Lisboy有啲野可以食，所以揀咗西式，原來西式晚餐竟然係Fine Dining + Semi Buffet。香港食個Fine Dining每人都要千千聲，依家酒店包2大1小，驚你唔飽仲包semi buffet。味道好，而任食甜品啱晒媽媽，啲甜品真係又靚又好味！最緊要餐廳員工服務一流，成日走來同Lisboy玩同問我哋味道如何，讚！
話明呢間是一間溫泉酒店，仲要河口湖極靚位置，睇到富士山。最正嘅是酒店天台的天空の湯設置，朝早可以一邊浸住溫泉放空、一邊享受富士山同河口湖美景，夜晚浸就享受滿天星空時間（到依家返嚟香港仲好有畫面）。大人可浸溫泉，小朋友都可以去迷你Playroom放下電，啱晒親子遊。
總括而言，呢間酒店服務/設施都啱晒一家大細親子遊。酒店仲有提供河口湖站接送服務，check in時有員工安排welcome drink，有花茶仲有bb嘅嘢飲，今次酒店送咗張富士山全家福俾我哋。早、晚自助餐都超乎想像，酒店有個迷你playroom同無敵富士山加河口湖景觀，所有嘢加埋，性價比好高，推薦大家去河口湖都可以一試！
p.s. 如果下次有機會早啲預訂，我想預訂佢哋嘅「天空的露臺」房，每間房內都有露天溫泉，咁就可以喺房內一邊浸住溫泉一邊享受富士山同河口湖美景！
風之露台KUKUNA
地址：70 Azagawa, 401-0303
圖文授權：Lazy Li’s｜你是•李氏
部分內容經《Oh! 爸媽》編輯部潤飾或修改
其他好去處：
日本親子遊｜ 沖繩民宿 推介：今年新開張豪華獨立度假屋 附設私人嬉水池 可BBQ+放煙花
