| 日期 | 全年適用 |
秋冬最啱浸 溫泉 放鬆一下，各位爸媽不妨趁周末短假期去珠海！當地有一個集娛樂、飲食於一身的溫泉度假村，溫泉選擇豐富，而且有穿梭巴士到關口接送，非常方便。最特別是4小時自助晚餐「大餐廟會」，有數十個食物攤檔營業及小販流動叫賣，現場所有飲品、食品都是免費提供！今次去體驗的Blogger有幸獲升級入住VIP房型，有私人風呂，度假村內亦有各種老少皆宜的康樂項目，一家人玩到樂而忘返！Blogger推介大家記得買一款套票，就可以舒舒服服咁返香港喇！
「珠海御溫泉渡假村」啱晒一家大細扶老攜幼去玩兩日一夜！聖誕假期，我哋一家人（4大1小）玩咗兩日一夜都唔夠玩，真心推介大家嚟親子旅遊！
酒店穿梭巴士會由關口接送到酒店大堂等候check in，等候嘅時候可以享用雪糕、蛋糕、飲品，任飲任食。我哋獲安排超正嘅天泉2號連「私人風呂」房型，係超級VIP房，超級幸運！
天泉2號係超級大嘅兩層和風設計客房，上下樓層各有一個私人風呂，可以俾大家可以有私隱咁浸浴。呢度嘅設計古色古香，連升降機都仿製成一座轎。
由於3點鐘先有房，等候時間就四圍玩遊戲，度假村已有餵食兔仔同馬仔、飛鏢、足球機、拋波波機、康樂棋等娛樂項目……當然最正係以下幾個主打項目：
1.御服園遊會
套票包御服換領券，同飲食券、遊戲券。飲食券，顧名思義可以換嘢食、嘢飲，而遊戲劵可以參與大街攤位遊戲。我哋着住酒店嘅御服參加園遊會，大人小朋友都玩得好開心，好似去咗嘉年華咁！最後啲遊戲劵仲可以拎去換小禮物，Lisboy收獲豐富。
2.煙花區
玩完攤位遊戲之後，我哋就去放仙女棒，超近距離見到煙火，Lisboy玩得超開心。
3.踩單車環繞度假村
由於套票包太多嘢，所以我哋第一日冇時間去踩單車，check out好之後就使用單車券，踩家庭單車環繞成個度假村，好有懷舊風味，有啲路上上落落都幾刺激㗎！中途仲有個好靚嘅車站，可以打卡影相。
4.泰式按摩
嚟到旅程尾聲，玩到攰攰哋就去按摩，套票包90分鐘泰式按摩，真係泰國人按摩，我舒服到瞓着咗。所以推介大家一定要買包按摩嘅套票，舒服完先返香港！
5.浸溫泉
呢個度假村嘅公眾溫泉只需買溫泉套票便可入嚟享用，但我哋房內已經有私人風呂，所以就冇去試公眾溫泉，聽講都有好多個大浴池。
我哋套票係全包宴，包早、晚、下午茶同酒吧街。呢個度假村最吸引嘅地方係佢哋嘅「大餐廟會」自助晚餐，當晚整個園區的氣氛超級正！可以食足4小時，食飽先出去夜市玩！第二日仲有自助早餐同埋下午茶食。
1.「大餐廟會」
「大餐廟會」地方好大，好有特色，成個市集咁，我哋可以去每間食店拎嘢，鍾意邊行邊食又得，搵個位坐低食又得。而我哋好好彩被升級到VIP房，所以可以入Lounge坐喺度慢慢食。
比較印象深刻嘅美食有：燕窩、手工雪糕、新鮮焗蠔、片皮鴨、手搖飲品、手切生果同太公分豬肉活動。咩國家類型嘅食物都有，而且款款都好味道，用飲食券仲可以換米酒、棉花糖等特色小食或者玩攤位遊戲，再加埋場內Live表演，真係令人喜出望外，我哋肚皮未夠大，唔可以食晒場內所有食物，好想再來感受多次！
2.酒吧街
酒吧街喺長勝莊酒店附近，套票包咗每人一杯嘢飲同小食。搞掂咗Lisboy訓覺，我哋就去咗享受Chill Time喇。
3.千色胡同自助早餐
自助早餐非常豐富，早餐時間係 7:30 至 12:00，瞓飽飽當食Brunch都得！餐點好有廣、港式味道，最記得生滾粥同大量人手新鮮製造廣式點心、布拉腸，豆漿同油炸鬼都係必食之選！
4.咖啡廳下午茶
Check Out之後就喺流浪咖啡食下午茶，環境、味道一流，有Live Show由朝唱到晚，係好高質嘅Cafe。
珠海御溫泉度假區
地址：廣東省珠海市斗門區斗門鎮斗門大道333號
圖文授權：Lazy Li’s｜你是•李氏
部分內容經《Oh! 爸媽》編輯部潤飾或修改
其他好去處：
珠海親子遊｜ 海泉灣 度假區攻略：浸溫泉+主題樂園+餵小動物 新酒店體驗介紹
