| 日期 | 全年適用 |
鄰近廣東省的福建省有多個旅遊熱點，包括知名的海濱城市——廈門，既可以漫步欣賞世界文化遺產鼓浪嶼的風光，更可以一嘗獨特的閩南美食！從香港出發，乘搭高鐵只需要3-4小時即可抵達廈門，對於港人來說亦十分方便。有Blogger在長假期來了一趟廈門高鐵6日5夜之旅，一家四口發掘了不少適合打卡、放電的好去處，入住唔使$600一晚的親子主題房間。即睇 廈門親子遊 有咩推介？
香港去廈門嘅高鐵大約3個幾鐘至4個幾鐘，我哋去程搭夜晚8點嘅高鐵，大約3小時10分鐘就到。
第二朝一早起身，第一站就係去打卡熱點——鐘鼓索道。可以預早喺美團買票（每張票會平￥6），當日因為美團可預約時間都滿咗，我哋就即管去現場試下，好彩現場少人，可以即場買票。
票價是成人￥80/張，1.2-1.4m小童￥40/張，1.2m以下小童免費。纜車全程大約40分鐘，每卡車只能坐2人。冬天坐係幾舒服嘅，環境又好靚，可以買啲少少食物喺車上食，如果夏天坐，無冷氣，就應該會好辛苦。
鐘鼓索道
售票處：廈門植物園西大門旁（廈門市思明區虎園路25-110號）
交通：地鐵1號線中山公園站下車，4號出口，往鐘鼓山隧道方向行約300米
營業時間：周一至周日8:30—17:30（17:30停止入場）
搭完索道，應該行大約7分鐘就會到鴻山隧道（唔知點解高德地圖係顯示行勁遠，大家最好到時問下人）。
穿過條隧道，可以有好多靚位打下卡，另外附近應該有個小公園可以玩，不過我哋冇特別去搵。
隧道出口位原來好近薑母鴨名店正時和利、沙茶麵名店烏堂，必試！正時和利的薑母鴨濃油赤醬，我哋覺得幾好味，之後喺其他餐廳試嘅薑母鴨，完全比不上。
鐵路文化公園（鴻山隧道）
地址：廈門市思明區萬壽路
廈門有2個好似香港科學館嘅地方，其中一個係廈門科技館，網上比較多人介紹呢個館。
我哋去當日係星期六下午，不過都唔算多人，除咗展館以外，有蛋仔派對嘅相應遊戲，例如用鹽疊高隻蛋、點樣用報紙包住隻蛋令佢落斜都唔會爛等等，玩完可以換禮物。
我哋由1點玩到5點關門，好似都玩唔得晒，留多一個鐘會好啲。
廈門科技館
地址：廈门市思明區體育路95號廈門文化藝術中心
開放時間：周二至周日09:00-17:00 （16:00停止售票）
如果廈門2個科技館只能去一個，必選這個！
理由1. 全幢都係玩樂設施，集科學館、遊樂場、playroom於一身；2. 勁少人，完全唔洗排。
中心有有地震體驗、VR、失重體驗等，真係好玩！
小提示：
-如果會玩埋3D，會送馬仔車券；
-要安排全日喺科技中心內，先會玩得晒；
-星期六會開到夜晚9點；
-長滑梯要130cm才能玩；
誠毅科技探索中心
地址：廈門市集美區杏林灣路339號（官任地鐵站3號出口）
到埗發現，酒店附近無食店，又唔近中山路，好似係好多景點嘅中間位，不過我哋全程都係打車，就冇咩所謂。
我哋頭2晚住海宇樓，之後2晚住馨悅樓。海宇樓係普通房，聲悅樓係親子家庭房（多啦A夢主題）。不過所謂嘅主題房都係舖咗床單、放隻公仔、掛個牌，不過$600/晚都唔使，仲想點……
|
|
|
我喺WeChat訂房（間唔中有優惠），食咗2日早餐，以大陸嚟計，都算幾好質素和多選擇，有好多廈門特色食物：花生湯、沙茶麵等。酒店食早餐記得記得坐窗邊位，會望到好多飛機升降。
酒店最特別嘅地方，係附有馨悅園，好大！好大！好大！我哋話有啲似九州御船山樂園嘅大陸版。
馨悅園有得免費餵動物，例如羊、駝鳥，另外，喺前台可以拎天鵝糧餵天鵝。
廈門悅華酒店
地址：廈门市湖里區悅華路101號
圖文獲「有個過度活躍媽」授權轉載
更多親子好去處：
台灣親子遊｜本地人推介 高雄 必玩親子景點 有趣科學實驗/模擬城市/超逼真駕駛工具體驗
上海親子遊 5大景點：必去野生動物園+迪士尼 推介2個小眾博物館！
珠海 親子遊｜2日1夜放電小旅行 親子主題房 任玩逾萬呎冰雪樂園+兒童遊樂場 人均只需$5XX！
即登記成為Oh!爸媽會員，或加入Whatsapp媽媽谷，緊貼第一手親子資訊。
