香港賽馬會慈善信託基金獨家贊助：M+博物館 全新畢加索主題家庭日 免費親子創意活動推薦

每逢周末就要諗同小朋友去邊度玩？西九文化區M+已經幫你計劃好啦！博物館嘅「家庭日」自2022年推出以嚟廣受歡迎，今年4月至6月更會以一系列全新嘅免費活動「親子隨玩現場」再度登場，喺特定周末為家庭訪客提供同特別展覽「香港賽馬會呈獻系列：畢加索──與亞洲對話」相關嘅四大創作體驗。所有活動都可以即場參與，咁就唔使擔心預約唔到啦！

展覽場內仲有專為親子參觀而設嘅自助導覽手冊畀大家免費攞，鼓勵小朋友同大人喺展廳邊玩邊學！二人或三人同行嘅家庭仲可以享有「大小同樂」展覽門票優惠組合添！

除咗特別展覽同相關嘅親子活動，「家庭日」當日仲有唔同主題嘅流動創意裝置「親子檔」停泊喺博物館唔同地方，歡迎大家自助參與！

「家庭日」活動日期 
4月27日至6月29日（每月下旬兩個星期日） 
時間： 10:00–18:00 
地點： M+博物館（香港九龍西九文化區博物館道38號） 
詳情：https://www.mplus.org.hk/tc/events/family-day-programme/

【家庭日】四大畢加索主題嘅親子活動包括：

1「畢」是繪畫嗎？        

繪畫可能係好多人接觸藝術嘅起點。【「畢」是繪畫嗎？】鼓勵大人同小朋友喺巨型畫紙上合力創作，透過由小朋友主導嘅塗鴉遊戲一齊打破約定俗成嘅繪畫概念限制，重新認識同探索繪畫呢種熟悉嘅藝術媒介。

參加者感想：

“冇諗過喺博物館都可以同小朋友玩得咁messy、咁開心！”
“試過先知原來自己都可以好似小朋友咁自由畫畫！”

地點：G層學舍工作室1
年齡：適合4歲或以上兒童及其家長一同參與
日期：4月27日、5月18日及25日、6月22日及29日
詳情：https://www.mplus.org.hk/tc/events/family-drop-in-messy-play-with-picasso/

注意事項：
• 每位兒童必須由至少一位家長陪同參與。
• 參與者於活動中會接觸碳粉顏料和乾粉彩。
• 衣着：建議穿着輕便、舒適且不怕沾染顏料的服裝。如有需要，請自備長圍裙、袖套或保護外衣。
• 清潔：建議自行攜帶毛巾或濕紙巾以便清潔手腳。

2 「畢」跡傳意

原來畢加索都有畫過水墨畫！【「畢」跡傳意】邀請大人同小朋友運用植物、布料等意想不到嘅素材，製作一枝獨一無二嘅畫筆。參加者仲可以將DIY嘅成果拎返屋企！

參加者感想：

“原來畫筆都可以自己整！輕鬆易做，啱哂一家大細一齊玩！如果第時再有呢啲活動，我一定會帶埋其他屋企人嚟參加！＂
“真心欣賞館方嘅設計，小朋友好需要呢個可以自由創作嘅空間！＂

地點：G層學舍工作室2
年齡：適合4歲或以上兒童及其家長一同參與
日期：4月27日、5月18日及25日、6月22日及29日
詳情：https://www.mplus.org.hk/tc/events/family-drop-in-picassos-paintbrush/

3 畢加索的幻想遊樂園

【畢加索的幻想遊樂園】以藝術家嘅青銅人像雕塑作品系列《游泳者》作為引子，邀請大人同小朋友創作唔同泳姿嘅人形裝置。

小朋友同大人可以隨意使用現場提供嘅顏色膠紙，喺牆壁或地上勾畫大家嘅動作剪影，然後運用唔同形狀嘅大型組件，堆疊出同自己身高相近嘅人形雕塑！

參加者感想：

“估唔到可以用膠紙嚟起稿！”
“博物館好似變咗個海灘咁，好好笑！＂

地點：B1層光庭長廊
年齡：適合任何年齡的兒童與家長共同參與
日期：4月27日、5月18日及25日、6月22日及29日
詳情：https://www.mplus.org.hk/tc/events/family-drop-in-picassos-imagination-playground/

4 畢加索的故事劇場

畢加索嘅創作靈感喺邊度嚟？【畢加索的故事劇場】透過互動故事劇場形式為小朋友同大人分享藝術家係點樣將生活經歷轉化成作品，邀請大家一齊探索畫像背後嘅小秘密。

參加者感想：

“故事劇場嘅內容非常豐富，小朋友極度專注，聽足全場！＂
“俾到我好多靈感！我終於諗到今晚返去同個仔講咩床頭故事啦！＂

地點：B2層潛空間
年齡：適合任何年齡的兒童與家長共同參與
日期：4月27日、5月18日及25日、6月22日及29日
詳情：https://www.mplus.org.hk/tc/events/family-drop-in-story-time-with-picasso/

【親子檔】全新設計流動創意裝置

【親子檔】係博物館為所有參觀人士而設嘅流動創意裝置，希望可以透過輕鬆嘅互動玩意，鼓勵人人喺展廳以外投入自主探索。歡迎大家自由體驗，唔使預約㗎！

1)   百泡箱

活用唔尋常嘅吹泡泡工具，參與一場製作肥皂泡嘅創意實驗！參與者可妁自由揀選流動創意裝置上佈滿孔洞嘅日常物品，隨意喺空中揮動，乘風吹出形狀趣怪嘅肥皂泡。

日期：逢星期日
時間：15:00–17:30
地點：地下藝術公園入口或B1層海濱長廊入口

2)   讀行俠

行到攰想休息一陣？歡迎嚟到呢個專為圖書愛好者而設嘅流動創意裝置稍作休息，輕鬆悠閒咁睇吓同特別展覽主題相關嘅圖書，啱哂鍾意同屋企人一齊睇書嘅大家！

日期：逢星期日
時間：10:00–18:00
地點：G層學舍（「家庭日」當天將設置在 B2層潛空間作為【畢加索的故事劇場】的部分裝置）

3)   展廳遊戲

出發欣賞博物館展廳包羅萬象嘅作品之前，不如嚟到二樓中庭玩吓呢幾個外形趣怪嘅互動裝置，嘗試意想不到嘅觀看方式？呢組全新嘅裝置係由香港建築師團隊AaaM設計，佢地經常以小朋友嘅角度為唔同社區改造遊樂場嘅設施，令呢啲遊樂空間真正成為小朋友嘅主場！充滿童心嘅大家實在不容錯過！

日期：4月27日、5月18日及25日、6月22日及29日
時間：10:00–18:00
地點：二樓中庭（須持門票進場）

承蒙香港賽馬會慈善信託基金獨家贊助，家庭日畢加索主題親子活動屬「賽馬會社區拓展藝術教育計劃」。