大灣區親子遊｜ 江門 熊貓親子營地樂園+《狂飆》取景地+室內動物園

今次放假，爸爸提議去玩遠啲，我地最後決定去咗 江門 玩！點解去咁遠？因為聽聞江門名冠金凱悅酒店好出名，交通方便、房間夠大、多嘢玩，性價比相當高。今次旅行玩足3日，非常滿足！到底酒店是未名符其實？江門有咩親子景點推介？即睇介紹：

大灣區親子遊 1.熊貓親子營地樂園

酒店旁邊嘅熊貓親子營地樂園，唔算好大但玩樂設施非常多，而且極新淨！有5層樓高既滑梯、車軚彩虹滑梯、多種攀爬架同多鞦韆、沙池、小朋友過山車、無動力過山車、彈床、卡丁車（需另外付費），趙bb完全玩到唔捨得走。

我地去玩咗兩日，最好嘅一點係可以全日無限進出，附近有兩個商場）——萬達廣場、匯悅•大融城，食嘢十分方便，或者返酒店休息一下再去玩過都得！而且樂園內有好多位置俾家長休息。

小貼士：

1. 早晚都入去，因夜晚燈光超級靚。
2. 場內有沙池，可以帶小工具去玩沙，園區內有洗腳地方。

大灣區親子遊 2.三十三墟街

景點嘅話，我地揀咗去 三十三墟街——呢個地方係一個舊城區， 同平時行開嘅商場好唔同，街上有好多小商舖，例如家品舖、 玩具舖、手工藝、陳皮批發、涼果舖 、咖啡店、小食食肆等，可以休閒地度過幾個鐘。

小貼士：

1. 極推介《越南咖啡》嘅「柑心情願」，其實係陳皮咖啡，甘甘香香好好飲。
2. 推介大家買陳皮涼果，可以慢慢試，有好多選擇。

大灣區親子遊 3.愛麗斯萌寵秘境

今次我地入夜場，只係需要$29就可以玩足4小時！

呢種室內動物園我冇去過, 但我估同深圳比較都係大同小異，入場買瓜菜就可以餵場內嘅動物。場內動物都幾多，有貓、水豚、 兔豚、蛇 、兔仔、雀仔、袋鼠、豬仔、羊駝、 鸚鵡、馬仔、 蜥蜴、魚、鴨……大部分都可以餵食。另外，場內仲有免費波波池可以玩！

個人感覺動物園係有味道，一入去好似好強烈，但我覺得可以接受，而且呢間店衛生唔錯。

江門 酒店住宿推介

坐直通巴直達酒店，依家巴士行深中通道，從深圳灣出發只需要一個幾鐘就到，真係好快！

一落車，行入酒店覺得非常大，底好高、感覺舒服。酒店設施好齊全，有室內室外游泳池、養生館、桑拿、按摩房、麻雀房、兒童遊樂室、桌球室、電影院。

我哋地今次訂咗豪華親子房，房間非常大，好似分成兩間房咁。趙bb對張碌架床超級心心眼，全晚喺床度又上又落。房內景觀好開揚，望到好遠既靚景，房間亦都好乾淨，無煙味、無霉臭味， 最開心仲有浴缸浸浴（酒店仲會提供浸浴袋！)

入住酒店可以免費享用自助早餐+晚餐，又可以汗蒸、 濕蒸、浸恒溫水池，更可以用住客優惠價享受按摩同沐足服務，凈係住酒店已經好享受！

名冠金凱悅酒店

地點 : 江門蓬江區發展大道188號

預訂按此

圖文授權：趙c9廚房 Chiu’s Kitchen

部分內容經《Oh! 爸媽》編輯部潤飾或修改

其他好去處：

深圳野生動物園 值唔值得玩？附攻略｜護士Vi媽三小火

越南峴港 之旅 扶老攜幼一家10口交通/住宿/飲食攻略 附六日五夜行程

廣州親子遊｜溫泉酒店 入住太空主題滑梯房 室內室外遊樂場免費玩

即登記成為Oh!爸媽會員，或加入Whatsapp媽媽谷，緊貼第一手親子資訊。