| 日期 | 全年適用 |
鄰近廣東的廣西省是內地一個熱門旅遊目的地，因有「桂林山水甲天下」的美譽，吸引了眾多遊客。除了著名景點象鼻山、龍脊梯田，山水如畫的桂林、陽朔還有許多新奇的體驗活動，例如悠閒的乘竹筏遊河；刺激的溶洞探險、戶外攀岩、親子自駕山地車，更可以騎馬觀光！今次Blogger一家四口的6日5夜 廣西親子遊 ，詳細介紹行程及入住2間親子酒店，非常值得參考：
早一日，我哋就上咗深圳玩，再喺深鉄鉑爾曼酒店住一晚，第二朝，一落樓下就係深圳北站，非常方便。我哋搭「深圳北（9:25）-陽朔站（12:15）」嘅高鐵出發喇！
4月係桂林旅遊淡季，打車好方便，坐車約40分鐘就去到「寶貝喜歡018親子酒店」。呢間酒店一晚￥300，性價比好高，最重要有大滑梯、波波池等，仲有樽裝可樂、雪碧任飲（夜晚8-10點提供熱鮮奶）。
酒店過馬路對面係戲樓，樓下又有間大超級市場，地理位置好方便。
寶貝喜歡018親子酒店（陽朔十里畫廊西街店）預訂按此
入住之後，我哋喺附近嘅興安米粉食完嘢，就出發去銀子岩。銀子岩是廣西桂林最大嘅溶洞，可以拍攝五彩燈光照射下色彩斑斕嘅溶洞奇觀，裏面景點多達28處，必睇「三絕」和「三寶」。
我哋行咗大約1小時，影完相就去旁邊嘅「奇幻山地車」玩。門票是網上搵人代購，￥280一大一小（包保險），另加￥198，可以有無人機拍攝。不過我哋無加，領隊大哥一樣幫手影咗好多相、拍咗好多片，服務態度值得讃！
活躍媽雖然日日駕車，不過初時駕山地車都驚驚哋，不過好過癮！陽朔仲有好多地方有山地車玩，如果去如意峰，可以選擇一間叫做「一鋒山地車」（記得上網搵有冇平啲嘅門票買）。
山地車玩咗大約1個鐘，過足癮之後，我哋就去西街行吓。晚餐喺春庄·壮飨厨房（山景西街店），味道都唔錯！
銀子岩溶洞&十里畫廊&西街 包車一日遊 預訂按此
遇龍河有好多條路線，我哋就揀咗水底呢一條（水厄底>綜合碼頭路線）。提醒：記得早一晚8點喺微信搶票！微信搜尋「遇龍河景區竹筏門票」，可預先填定資料。呢條路線據稱係風景最靚，同埋有少少刺激位，所以最多人搶。全程大概30分鐘，其他路線時間會較長，如果擔心小朋友悶嘅家長要留意。
遇龍河竹筏漂流 預訂按此
第二站是去十里畫廊野騎，大約半小時（大人￥75、￥小孩¥65）。平時騎馬多數都係圍一個圈行，野騎好好玩，啲仔勁鍾意！陽朔野騎路線通常係花仙谷馬場、興坪古鎮、十里畫廊，我哋就揀咗最近遇龍河嘅十里畫廊。
第三站是十里畫廊內的「一尺稻田咖啡」，非常值得去，風景好靚！小貼士：陽朔消費水平（咖啡、食物等）較貴，但對於香港人嚟講應該都是平，不過都是做好心理準備。
第四站是去玩飛拉達，主要是俾兩個仔玩，由教練帶佢哋，￥320/人，大概玩2小時。陽朔有幾個玩飛拉達嘅地方，教練收費不一，不過好多都是大學生兼職做。大家可以格價再考慮。
我哋午餐喺「小董私廚」食咗竹筒雞、芋頭、白菜，呢間餐廳好味，原來係本地人會食嘅餐廳，十分推介！
最後教練送我哋返回酒店，喺附近解決晚餐，順便行吓戲樓同超級市場。
飛拉達攀岩基地預訂按此
今日全日跟莫教練去玩，首先去探洞（￥280/位），去初級嘅月亮水岩探洞。教練講解超詳細（大約有10隊尾隨我哋嘅人都慢慢超前我哋）我哋仲睇到蝙蝠！建議大家可以着泳衣去，咁就直情可以跳落泥漿度玩。
月亮水岩景區門票 預訂按此
然後去福利鎮市場食米粉，係我哋喺桂林之旅中食過最好味嘅一碗米粉！逛吓本地人市場，都係唔錯嘅體驗。
4月到桂林嘅限定活動——挖筍！同市場見到嘅竹筍唔一樣，我哋挖嘅竹筍係花皮嘅。挖完竹筍後，教練再帶我哋去一間本地人餐廳加工食，雖然環境一般，但味道真是好難忘，自己拔嘅新鮮竹筍好嫩、好鮮味！
早上就出發去桂林，喺高德打車大約￥125，車程約一個多小時。我哋喺桂林入住「詩與遠方·象山有約酒店」，訂咗親子房，房門口就係playroom！
除咗啲仔覺得好正，我都覺得好正。因為佢哋一起身，就沖出門口玩，我可以慢慢執嘢。呢間酒店真係幾好，下午1-5點有免費下午茶，個仔去游水，我就食tea。7樓仲有得按摩，我最後一日等啲仔訓晒，去咗按，好舒服。
詩與遠方·象山有約酒店（桂林象鼻山兩江四湖店）預訂按此
首先去桂花公社，諗住比佢哋整下桂花糕，原來係旅行團嘅景點。而且整桂花糕簡單到不得了，一壓就係，有啲無聊。之後再參觀桂花文化體驗館，最後，就係食杯桂花味雪糕。
就係因為個仔常識科教象鼻山，我哋決定去桂林，一定要嚟象鼻山打卡！小貼士：從3號門入，2號門出，旁邊就係日月雙塔。
桂花公社 預訂按此
掙扎咗好耐究竟去唔去，因為驚睇風景啲仔會悶，不過媽媽真係好想去。活躍爸建議帶部無人機去俾佢哋玩，問題解決！
成個行程之中，只有今日包咗車，￥400全日（包2個寨）另加高速費￥64，非常抵。約咗司機9點到酒店，由酒店去龍脊購票口大約一個半小時，路況比想像中好，門票大人￥80，小孩￥40。
龍脊梯田一日私家團 預訂按此
第一站：黃洛瑤寨。先去睇長髮館，再去睇長髮表演（￥80/位）之後就喺附近食午餐，
第二站：金坑大寨。要搭纜車（來回車票大人￥100，小孩￥50），雖然4月淡季，梯田風景算普通，不過我都覺得好靚。
第三站：平安寨。要搭平安觀光車（來回車票￥50/人）。呢度嘅梯田灌咗水，好靚呀！
最後回到酒店已經晚上7點了，洗漱休息。
我哋搭12點嘅高鐵返香港，所以喺酒店食完早餐，就去對面百貨大樓行超市，之後就去桂林北搭高鐵回程了。
圖文授權：有個過度活躍媽
其他好去處：
台北親子遊｜5大 文化深度 親子一日遊 路線 帶小朋友邊玩邊學
大灣區親子遊｜ 江門 熊貓親子營地樂園+《狂飆》取景地+室內動物園
即登記成為Oh!爸媽會員，或加入Whatsapp媽媽谷，緊貼第一手親子資訊。
