【玩盡18區親子好去處】--中西區

中環除咗係商業中心，其實都有好多適合一家大細玩嘅地方。而且呢啲地方完全唔遠，由港鐵站行15分鐘就可到達！我哋為大家整理好中西區各個假日好去處，各位家長一定要Mark實喇！

睇展覽學嘢：

金管局資訊中心——唔講唔知，原來金管局有個資訊中心開放俾市民大衆參觀。中心内有一條歷史長廊，概述整個香港貨幣歷史，行下行下會見到一幅由硬幣堆砌而成的維多利亞港景色，總共用咗135,811枚硬幣；而硬幣總值有$61,582.8。

家長唔需要擔心小朋友會悶，因爲每個課題都有唔同展板同埋互動裝置，去到「智」醒特工區域更可以同電腦或者其他小朋友對戰！最後真僞鈔區域更有真銀紙供大衆任睇任摸，大人小朋友不妨留意下紙幣上各種不同細節位！有一點要留意，中心開放時間為星期一至五上午10:00 – 下午6:00及星期六 上午10:00 – 下午1:00，星期日及公衆假期休息。

立法會——大家都知道立法會係政府官員開會商討政制的地方，但原來裏面有個兒童學習室，家長可以預約講故事同活動環節，之後預約埋立法會教育導賞團，一次過行勻立法會。講故事環節，小朋友可以透過故事了解立法會議員及政府官員日常工作，如何透過立法建立更美好的社會。最後更會派發證書予小朋友。

而活動環節就會開放活動室給于小朋友同家長自由玩樂。教育導賞團會有專人講解，先帶小朋友參觀會議廳，親身踏足新聞常見的地方，之後就去歷史長廊，講解立法會多年變遷，整個過程約30分鐘。注意，市民每日只可以預約講故事或者活動環節其中一個，必須親臨立法會或電話預約。而導賞團則可網上預約。參觀完立法會更可在立法會内餐廳購買外賣，到立法會外的添馬公園野餐放電。

展城館——位於立法會旁邊約5分鐘路程，是參觀立法會後下一個行程的選擇之一。進館後可先在接待處取QRCode，啟動之後你就可以到各層啟動每項電子設施。館内每層均有不同展覽，三樓主體放映區兩旁都有大屏幕播放香港不同地區的發展計劃，中間有香港九龍的模型。

二樓，呢一層嘅主題係「策略宏圖」、「策略性基建設施」、「交通及運輸」和「可持續發展」，有不同裝置如水管，紅綠燈等展品，以及問答遊戲及互動設施，小朋友一定玩到唔捨得走。