| 地址 | 流浮山深灣路 |
| 日期 | 全年適用 |
又到螢火蟲季節，今年決定自己去，跟上年地點一樣，去尖鼻咀找尋螢火蟲足跡，上次體驗實在好難忘，見到四周充滿一點一點螢光，又遠又近，一閃一閃，感覺好壯觀。
上年跟團半日行程都玩得好開心，今年自己安排行程，時間就鬆動好多，可以去自己喜歡地點，一到夏天當然想去沙灘，小朋友玩沙玩水非常暢快，夏天最愛陽光與海灘。
今次海灘選址係蝴蝶灣，因為少人而且近門騎術學校，正正係沙灘對面，當然要去探下d馬仔，其實騎術學校係開放比公眾，開放時間可以自由參觀，除咗馬房之外，其他地方可以自由出入，當然亦可以安排團體參觀就有導賞，不過小朋友要6歲先有得騎，咁等多兩年先去都唔急。
除咗睇馬之外，仲可以睇人上堂，非常有趣，始終係騎術學校，唔係參觀農場，大家要保持安靜，同唔好餵馬匹，大家要自律啊。靜靜近距離觀察馬匹動態，其實小朋友已經好開心，有學生練馬時，真係型到飛起。
屯門騎術學校環境優美，馬匹嘅屋企真係好乾淨，有一個大馬房同幾個練習場，嗰度保安非常深嚴，所以邊度去得，邊度唔去得即刻有人話你知，下星期日母親節係開放日，到時有好多嘢玩，可以考慮。
http://www.lcsd.gov.hk/tc/prs/index.html
睇完馬就去蝴蝶灣泳，蝴蝶灣非香港最靚沙灘，不過假期去沙灘最怕多人，對於揸車嘅家庭就更怕搵位泊車，我鍾意蝴蝶灣夠少人同有車位，唔想同人迫可以考慮下依個普普通通唔多人去沙灘。
好戲真係在後頭，玩完一輪終於到戲肉，睇螢火蟲最佳時機係天色漸昏暗，大約7點開始，而時間亦只到九點，入夜就會無咁多，因有上次經驗，所以今次亦安排一樣時間到達，希望可以捕捉到螢火之光。
到達之後有一段路先行到草叢地點睇螢火蟲，上年九月去行依段路感覺好熱好遙遠，唔知點解，所以今次就決定踩單車入去，反正小朋友咁鍾意踩，就將體驗變得更有趣，夜行車隊陣容去搵螢火蟲，開心到呢！
如果大家選擇自駕就先泊好車然後行入去，大約十分鐘平路，可以推B車，不過入草叢就要放B車出面，必須準備膠袋包腳，入草叢泥地處處，亦可以選擇著水鞋，保護對鞋係一定要，否則有排洗。
入到草叢要關掉任何光源，要保持安靜唔好破壞大自然氣氛，安安靜靜去欣賞同感受四周一閃一閃螢光⋯⋯今次見到無上次咁多，不過亦有唔少，好得意，飛嚟飛去閃閃下，好好體驗。
泊車地點：
Bus Parking Lot
Lau Fau Shan
https://goo.gl/maps/i4NUJH56b742
螢火蟲地點：
Tsim Bei Tsui
Deep Bay Rd, Lau Fau Shan
https://goo.gl/maps/eD8f7iHTBNn
如果無車就建議跟團去，一樣係好好玩，今次選擇自己去因為識去同自由度高d，而且踩單車入真係爽到不得了，沿路有共享單車租，數量不多，所以唔自己帶單車都有得踩。
另外，附近亦有幾個農場，大家可以考慮日頭玩農場，夜晚觀螢火蟲，不過天氣熱咗我比較喜歡玩水，仲有個好玩鈎蝦BBQ場之前都去過，都係喺沿路。
幸福山莊
Lau Fau Shan
6142 2917
https://goo.gl/maps/jPYN8hHeW1M2
作者：Day Day Play