| 日期 | 全年適用 |
終於秋高氣爽，又係放 風箏 的好時機。今期《Oh！爸媽》訪問咗香港 風箏 競技會會長賴華星、 風箏 達人Jimmy及HK Kit.com的陳生，推介全港適合親子的 風箏 場，有熱門有靚景有方便有隱世，總有一個 風箏 場啱大家！
香港風箏競技會會長賴華星（左）經在香港及世界各地參加風箏比賽，故有乜好玩的風箏場一清二楚。圖為西貢泥涌。
風箏達人Jimmy經常到本港各地放風箏。
1.泥涌：專業玩家至愛
西沙路泥涌村，鄰近馬鞍山新市鎮，由港鐵烏溪沙站乘巴士可直達，都算方便。假期這裏很多人放風箏，部分更是專業玩家。業餘愛好者想放風箏都好易，附近士多有得買。還有西沙茶座啱晒一家醫肚。泊車亦容易。泥灘對住吐露港，環境優美，小碼頭更是熱門景點，假日有人垂釣。
風力：3級
地點：西貢北西沙公路泥涌村
交通：由港鐵烏溪沙站坐99號巴士到泥涌站下車。車站旁有幾級樓梯走下去，再穿過小徑便是。
2.大坳門郊野公園：大草地任奔放
大坳門喺西貢清水灣郊野公園內，該處位處高山，風景超靚，加上風力強，好啱放風箏。政府亦特別闢咗個風箏場，假日放風人最多，萬天風箏場面更是全港獨有，但好彩草地夠大，小朋友可奔跑放電。園內有燒烤場、涼亭和洗手間等設施。入口處約有30個車位。亦有玩樂設施、家樂徑和自然教育徑，行埋山都仲得。
風力：3級以上
地點：西貢清水灣
交通：1.鑽石山港鐵站乘91號巴士；2.將軍澳港鐵站乘103M小巴；3.寶琳港鐵站乘16號小巴；至大坳門道迴旋處下車，再往大坳門路步行約20分鐘。
3.龍蝦灣郊野公園：被遺忘的風箏場
嫌大坳門人多，可去附近龍蝦灣郊野公園，這裏有個被遺忘了的風箏場，原因是地點偏僻，在一條長長單程山路盡頭，公園入口又跟馬術訓練場共用，好多時經過都以為唔入得，其實推門通過訓練場上山便到。不少專業玩家愛這裏，貪人煙少，海景靚，風力強。但配套設施就較大坳門簡陋。
風力：4級以上
地點：西貢清水灣
交通：乘坐的交通工具跟住大坳門相同，只是下車後沿龍蝦灣道(柏油路)步行約30分鐘。
