【小周董世界】有生蠔食有魔術睇仲要小朋友免費，呢個lunch buffet真心抵。

小周董同我講6月1號係兒童節話想出去慶祝下，雖然我心唸乜兒童節唔係4月4日咩？哈~不過算啦!! 當用個藉口出去食餐好，都幾開心啊。所以上星期六我哋就去咗灣仔呢間酒店食自助餐，因為呢度周末lunch buffet 有生蠔食，正！最重要係只要Like咗酒店Facebook，就有85折同埋2位成人仲免費送一位小童，真心抵呢。

Buffet除咗生蠔仲有好多唔同嘅海鮮，同埋刺身壽司選擇，全部都好新鮮，最高興嘅係仲要無限量供應，我哋食咗至少兩個鐘頭，由頭到尾冇間斷過都有得食，唔洗爭唔洗搶。

我好鍾意食三文魚，呢度嘅煙三文魚好有煙熏味，新鮮三文魚刺身亦都好肥美，食到我非常滿足。