11月係報讀K1嘅「面試旺季」，我家小JM出年都準備要返學，所以亦都難逃面試。
隨著最後一場面試嘅完結，我並無諗住要分享所謂嘅「面試技巧」或「面試攻略」，
因為我明白到小朋友即使係久經練習都好，臨場亦未必可以一如往常般願意回答老師問題，
小JM係一個觀察型嘅小朋友，面試嘅節奏急速，往往都唔太願意開口講嘢，最多臨走前先願意講幾句。
但亦好開心見到原來有啲老師都會觀察小朋友表現從而了解小朋友，而非「一次定生死」。
當日面試結之後，爸爸就帶咗我同小JM去彩虹村，等小JM可以睇下舊式屋村嘅面貌，同時亦可以感受一下舊式屋村獨有嘅特色。
彩虹村係香港最早期興建之公共屋邨之一，除咗四周充滿舊日痕跡之外，其實七彩繽紛嘅外牆亦係吸引之處，更因為設計獨特嘅關係，喺1965年榮獲香港建築師學會嘅建築獎項銀牌添。
一個咁有特色嘅公共屋邨又點可以唔帶小JM去體驗一下呢?
由於到達彩虹村已經差不多中午時分，我地小JM家第一時間當然係揾地方「醫肚」先啦。
爸爸決意捨棄一般食肆或連鎖店，反而找尋獨有嘅舊式快餐店。
^餐廳內嘅裝修雖然有點陳舊，但話語間聽出大家都好融洽。
^餐牌高掛於牆上一角
其實媽媽贊成食呢間傳統餐廳都有啲私心㗎，因為我想要尋回兒時食過嘅「蕃茄雞脾飯」味道呀。
今次我地就叫咗兩個碟頭飯，分別係：餐肉雙蛋飯、蕃茄雞脾飯。
老老豆豆，個雞脾飯又真係似以前細個食嘅味喎，連小JM都話好食添。
食完飯之後，媽媽去咗一間舊式士多買嘢飲。
呢間士多裏裏外外都充滿懷舊足跡及情懷，令我諗起以前細個住喺西貢時，家門樓下嘅舊式鋪仔同士多。
鋪內嘅格局及食品都一樣令人懷念。舊式嘅果糖及玩意，已經唔太易搵到啦。
呢度剛好有「吹波膠」，於是媽媽都忍唔住要買來玩。
不過好似比以前嘅細枝咗咁嘅？
就係我遊走於店內嘅時候，爸爸就俾小JM玩咗彈波波機。
小JM雖然係第一次玩，但竟然俾小JM來咗個全中「All-in」。
快樂其實可以好簡單，一蚊就已經令小朋友有無限歡樂！
雖然獎品係隨機出，但能夠贏得禮品已經可以令佢地樂上半天。
小JM憑自己嘅「實力」以一蚊換來兩份小禮物，一份係星星貼紙，而另一份就係具懷舊感嘅伸縮紙棒。
只係一枝伸縮紙棒就已經令小JM玩到忘我。
而我呢，就緊係吹波膠啦！話晒都算係兒時回憶呀嘛～
吹完個波仔就俾小JM拎咗，已經叫咗佢小心啲玩，點知都係好快爆咗。
唔多唔少，一枝吹到三、四個波波左右。
想叫小JM拎住來影相，但佢就玩到忘晒形。
都唔知捕咗幾耐先影到張似樣少少～
要上來呢個平台都好容易，我哋經3號梯就已經可以上到來。
當日因為假期嘅關係成個平台有好多人，唔單止有香港人，仲有台灣旅客添～
我地仲互相幫大家影相添。
因為係突然成行，所以無帶腳架，就只好同爸爸兩個輪流揸機影相啦！
一齊來睇下爸爸、媽媽眼中嘅彩虹村人像又係點架啦！
媽媽視覺：
爸爸熱愛籃球，所以來到見到有球場亦不忘問波友借籃球過手癮。
亦因為有籃球在手，所以就促成咗以下呢幾張相：
唔知點解，影完出來又好似變咗有故事性咁，都幾特別。
爸爸視覺：
爸爸話要不經意，所以隨意就好。我亦只求唔變大媽。
覺得點？還可以呀嘛？
趣事一則：
話說當小JM自己跑緊玩緊時，爸爸話不如自拍一下。
正當我地打算自拍嘅時候，怪事發生啦！
你睇！多咗隻手呀！！！！
唔駛驚，係小JM知我地自拍夾硬要做攝石人啫。
彩虹邨雖然係舊式屋村，但依然有好多人住㗎，所以係影相嘅同時最好先問準一聲及避免打擾到邨民喔！
1.) 港鐵彩虹站 C3或C4 出口
2.) 途經彩虹村丹鳳樓附近的巴士:
10, 111, 11C, 21, 258D, 259D, 268C, 269C, 3D, 3M, 3P, 62X, 671, 9, 95, N121, N216