事隔一年，我哋又再次到訪「石排灣郊野公園」大熊貓館，終於遇到好天氣。
入園時間大概喺早上11點半左右，太陽都開始猛烈，幸好有少少風啦。
對鍾意動物嘅和牛B嚟講，呢個景點絕對係必到。
呢度有迷你海洋公園睇動物嘅感覺，當然只限睇動物部份啦。
如果唔參觀大熊貓館嘅話，就唔需要額外俾入場費。
免費區就有小熊貓館、猴子籠；小湖就有天鵝、火烈鳥等。
如果要參觀大熊貓館嘅話，可以喺精品店購買入場券。
13歲或以上(包括成人)$10/位一小時。
打算去參觀嘅話，記得要留意下午1時至2時會休館。
購票時，就算小朋友係12歲或以下，都要通知職員啊。
呢個湖有黑、白天鵝，另一邊仲有火烈鳥、鴨等。
其他免費動物區，有多個品種嘅猴子類動物。
呢隻松鼠猴，身手超級敏捷!
呢到都有和牛B好鍾意嘅「金金」川金絲猴，佢係藍色面嘅猴子。
和牛B睇得超開心呀﹗
珍稀動物館，入面住咗小熊貓。
買齊入場券，依照參觀時間就可以馬上去參觀了。入場時記得將飛交俾職員，佢會撕走飛尾。
呢度格局好似香港海洋公園嘅大熊貓舊館，但就光猛好多。
懶洋洋嘅大熊貓
努力食緊竹葉嘅大熊貓。
入場後，記得要遵守場內嘅規則，唔好喧嘩，影相唔好用閃光燈，同埋唔好拍玻璃等。
大熊貓館陽光充足，仲有涼快嘅冷氣。
大熊貓館外面，有唔少靚靚影相位。
