| 日期 | 全年適用 |
基本上，今次行程完全冇計劃去食啲乜嘢特別嘢，只係打算行到邊就食到邊（始終第一次自己帶住個仔去玩，都唔敢走太遠）。不過唯一有計劃嘅，就係呢個Mr. Men主題餐廳。上機前，我哋喺FACEBOOK見到介紹，睇見個地址都係離酒店八分鐘路程，咁近都冇理由唔嚟食啦！
初時都打算嚟食晚餐，不過上網睇過餐廳嘅食物介紹，好似啲甜點比較吸引多啲啲，所以最後我哋就決定趁去玩完攰攰哋，嚟食個甜品當下午茶休息一下啦！
由於小小豬都有睇開Mr. Men系列嘅圖書，所以佢都對一眾主角都唔會陌生。當入到餐廳見到咁多Mr. Men，佢都不知幾興奮！
四周圍都用咗Mr. Men再加上新加坡特色做佈置，真係好靚呀！
座位旁放咗好多唔同嘅公仔，當然又係影相好時機啦！
小小豬見到咁多公仔，仲主動叫我幫佢影相添（放心….啲公仔都好乾淨呀！）
