| 日期 | 全年適用 |
好多時去親子餐廳，都係小朋友最歎最開心，食得好又玩得放，大人就跟出跟入仲辛苦過返工。呢日去到馬灣這間臨海親子餐廳Cafe Roma，終於可以過一個悠閒下午歎一歎。
去馬灣成日都覺得好遠，其實除咗由中環碼頭搭船過去珀麗灣外，仲可以到青衣或葵芳搭NR330，幾乎每10分鐘就有一班（$9.5），而且都只係花10-15分鐘就到。
Cafe Roma位於馬灣東灣沙灘旁，只要在沙灘廣場落車，然後行幾步、搭Lift落去地面一轉左就係餐廳，方便到爆！
餐廳裝潢充滿歐陸氣息，未入去都已經感受到陣渡假氣氛。Cafe Roma由芬蘭藉集團行政總廚Jaakko Sorsa主理，精心炮製小朋友最鍾意嘅美食。
由於餐廳跟馬灣沙灘相連接，一出餐廳外就已經係沙灘，所以小朋友未坐䁔張櫈就嗌住要出嚟玩。
餐廳都專程為小朋友準備多款沙灘玩具，小朋友可以食飯前後到外面玩沙。
嘢食未到之前，哥哥就帶埋芊芊出去外面玩沙，我同媽咪可以好放心喺餐廳裡面飲住杯嘢傾吓計，因為只係隔住塊玻璃窗就可以清楚睇見外面小朋友玩緊嘅情況。
