【DayDayPlay】浪茄,沒有最靚,只有更靚!


全年適用

沒有最靚,只有更靚!

今日再同陽光玩遊戲,去香港數一數二靚沙灘浪茄,一直都想重遊此地,做女嗰時曾經自己一丁友由西灣亭行去浪茄,印象係非常艱苦,斜坡斜到似爬一樣,一拖二就未有勇氣再行。

所以選擇懶人方法,坐的士去東壩行去浪茄,傳聞沿路風光如畫,行半小時就到,就一於再勇戰浪茄,香港咁多隱世靚灘,係要d腳力先可以去到天堂之美嘅大自然景象。

首先我哋泊車去北潭涌,平日早上大把車位,反而的士就無乜,等咗陣就有車,沿途風景已經好醉人,加上今日陽光普照,藍色天空下感覺實在好舒服。大概$80車程就到達東壩,即係去浪茄起點。

落車後其實得一條山路可走,小斜上都算易行,我哋心口寫個勇字準備挑戰炎夏,排除萬難向山上走,起步11:09分,小朋友都十分興奮,行呀行,行咗幾步小朋友已經要食零食,再睇時間先係11:11,哈哈!

搞一輪又影下相,又睇下牛,用咗四十五分鐘終於十二點正到達,上山路程唔辛苦,落山就佔大半,而且好斜,即代表回程應該好金下,而事實回程真係金過八両金,上斜梯級真係行到斷氣。

當然小朋友能力比我哋強,而且有伴陪住行,令整個路程都變得更好玩,完全零休息一囗氣行回程,加上回程太陽已落山,大自然風扇係咁吹,就算揹住一袋二袋亦無想像中辛苦。

而個沙灘真係水清沙幻,浪茄無任何設施,無小食亭、無得沖身、無太陽傘租⋯⋯名副其實「百無」!而有嘅係一個世外桃源嘅景色,人煙稀少嘅沙灘,今日無船p,完全包灘想點玩就點玩,完全寧靜地獨霸浪茄。

 

 

浪茄有營地,所以亦有營友在場,營地有樹蔭,海風下超清涼,雖然今日太陽伯伯好落力,但完全唔辛苦,曬住亦唔覺得暴曬,當然用咗成支太陽油係咁補,吹住唔覺最易曬傷。

而浪茄超大浪,哥哥係愛浪之人,不過始終無救生員,有一定危險,所以都係淺水位置玩下浪,好彩今日有個全能爸爸同行,掘咗個沙池比小朋友浸浴,超涼快,游唔到水都可以浸下水。

玩咗三個半小時,太陽開始落山,天氣亦開始涼,仲要行山回程,所以唔可以太夜走,回程的確有d吃力,始終上斜梯級多,不過路程唔長,可以捱過,去到東壩好彩即刻有的士,好快就回到北潭涌。

浪茄真係好靚、好值得去,當然路途比較遙遠,不過小朋友絕對可以應付,妹妹三歳來回自己行,仲行得好快,始終行山有伴係會好玩好多,所以玩住行係唔會覺得攰。

 

作者: Day Day Play 

其他文章:

【Day Day Play】西貢漁排釣魚x坐船到星星灘玩水睇海星

【Day Day Play】馬鞍山園藝農場 親子遊戲玩足一日也透心涼


熱門文章

室內遊樂場 2021|全港20大好玩室內放電遊樂場
親子好去處︳海岸公園探石·東平洲︳小肥子星球
【親子遊車河】50個香港自駕遊好去處
兒童遊樂場 推介 攀爬設施+可愛造型|親子好去處 (不斷更新)
親子餐廳 2021|全港31間親子餐廳大檢閱

兒童遊樂場 推介 攀爬設施+可愛造型|親子好去處 (不斷更新)
親子好去處 | 元朗信芯園3萬5千呎向日葵花海 香檳色+酒紅色向日葵登場
偽日本聖巡|姆明谷小屋+刀劍神域被囚禁之妖精女王の鳥籠 |免費入場|4大打卡呃LIKE位
親子郊遊|古洞水塘 尋找傳說中的「山之心」港版心形湖
親子郊遊|屯門新蒲點 空間廣闊盡享異國風情 棕櫚樹/大草地/燈塔 Chill住睇日落
親子好去處 | 觀塘海濱音樂噴泉今啟用 每日3場表演周六日假期加開兩場
查看更多   ▸