【呀劍萬帥】適合一家大細的夢幻Party Room：Best Neverland

「如有天櫻花再開…」去過咁多個波波池，今次去嘅「Best Neverland」，終於玩得又睇得啦！仲記唔記得Neverland喺邊度見過呢？咪就係小飛俠個夢幻島囉，呢個Party Room個名仲叫「Best Neverland」。呢排熱到咁，真係去街都有機會曬傷，同一班爸爸媽媽朋友，一家大細嚟呢度玩，真係啱晒呀！

坊間有好多大大小小不同的Party Room，但係大部分都係適合年青人或大人、又或者只適合小朋友，如果又要啱大人同時又可以俾小朋友放電，大家可以考慮一下Neverland。主打景點就係呢個櫻花樹下的波波池，哥哥一跳入去就大嗌「好深呀」，因為真係好多波波呀。

今日帶埋朋友仔一齊玩，咁啱有兩個心型充氣墊，配合埋個櫻花樹真係好浪漫。

將啲波波放入糟內（樹根部位），就會喺上面嘅雀仔屋噴番出嚟。

環境好乾淨，我睇過其他Blog及Media介紹，見到啲公仔都唔同晒，發現佢哋會定期更換保持衞生。

呢個透明吊椅，都係值得打咭位之一。

哥哥就最鍾意潛晒入波波裡面。