| 日期 | 全年適用 |
今個夏天超級熱，見到啲blogger媽媽介紹一啲室內兒童遊樂場嘅時候其實都心郁郁想帶
魔王芊去。
可惜我係在職媽媽
，帶得佢去嘅日子都係得禮拜六日，俾一個唔平嘅價錢入到去分分鐘都冇乜點玩到
（因為芊羽仲細個
，實在冇辦法同2歲以上小朋友死過hahahaha）
試過山長水遠去到銅鑼灣，結果人太多，playroom嘅職員姐姐都唔建議我哋入去。
早幾個禮拜一家三口趁禮拜日放假，
遠征長洲。
吃貨媽媽當然狂掃街，面咁大塊嘅西瓜冰菠蘿冰
、棒球咁大嘅魚蛋
，全部都由媽媽幫芊羽代勞好了
。
嚟到節目重點，行上半山嘅兒童遊戲室。（出碼頭向右邊行，去到759，入左邊小巷一直上，上到咁上下會見到馬會
，就唔洗再直上，要向左行，大家唔好怕醜要問下人
，嗰日Google唔係太幫到我
，利申：Wilma媽同芊羽喺日本單拖都係靠Google Map）
去到體育館，G/F就係遊戲室。
拎完籌等咗10分鐘倒就入得去喇
，果然遠征係可以玩得放啲，就算係禮拜日，小朋友都唔算多
，芊羽可以爬嚟爬去揀佢鍾意嘅牆壁遊戲再企定定玩。
設施上兩邊嘅空間都鋪晒軟嘅地墊，而最矚目當然係大大座嘅滑梯，通常係付費嘅Play Room先會見到呢！
牆壁上有六種遊戲，可以俾細啲嘅BB練練手指。
除咗一般遊戲室都會見到嘅攀爬設施之外，因為呢度係長洲，當然唔少得有長洲特色嘅搶包山遊戲啦（一個類似室內攀石嘅物體）
雖然呢度設施比付費嘅簡單，但對初試Play Room嘅小朋友絕對足夠放電！
而且人少少，如果媽媽們平日帶小朋友去，分分鐘係包場了
離島真係一個好適合同小朋友去嘅好地方，芊羽暫時去過塘福同長洲，期待下個checkpoint！
長洲體育館-兒童遊戲室
主題：「長洲特色」
面積：124.8平方米
地址：長洲醫院路3號
開放時間：早上7時50分至晚上9時40分（不包括下午12時40分至1時50分），每節時間50分鐘