| 日期 | 全年適用 |
人人端午節都去游龍舟水，我哋就瞓到自然醒Hea吓Hea吓到黃昏先出去九龍城踩單車，最正去埋隱世士多食好嘢。最好的好去處就係同一家人唔跑景點、唔趕時間，自由自在隨意的去玩。呢日我哋等到就嚟黃昏先出嚟，去到賈炳達道公園的單車徑踩單車。由於九龍寨城公園同埋九龍城廣場就在旁邊，其實踩完單車仲可以過去玩去食埋嘢先番屋企。
單車亭就近打鼓嶺道，我哋在附近落車，然後過條馬路就到。
呢度好多單車，唔駛怕來到冇單車租，即使我呢日嚟到超多人，都仲有咁多部可以選擇。
時租：單車$70/1.5小時，$90/2小時（可能係假日價，所以都幾貴）。
單車亭旁邊仲有好多位置，可以俾初學者喺度練一練Warm Up下先。
除咗單車，仲有雙座位的出租，以為海濱公園單車徑先有，估唔到普通單車場都有。
出發！出發！
單車徑全長約1公里，整段單車徑總共有3個亡命斜，出發冇耐就遇見第一個急彎，初哥一定要減速呀！
踩完一個圈發現有人炒車，就番嚟同我悄悄話。
芊芊就未識踩兩個轆，所以都仲係踩住輔助轆單車先。
兩個一齊喺練習場踩住圈先。
哥哥除低頭盔之後個髮型又幾好睇喎。
又見到哥哥呢個暖男行為啦，喺度教芊芊點踩單車。
最掃興嘅時候嚟啦，兩個話要去廁所喎（心諗一路計緊時㗎，廁所又遠……一來一回冇咗15分鐘）。
嚟得九龍寨城公園，一定要去南門呢邊的小食亭。如果有睇開我的文，應該都聽過我介紹呢個小食亭最出名係咩。
唔好以為細細間普普通通，其實有好多寶，呢啲先稱得上係「隱世小店」。
零食汽水小玩意一定唔少得啦。
亮點嚟啦，最馳名的就係呢個魚蛋豬皮蘿蔔啦，而主角就係本土出品白蘿蔔。
完全冇根冇渣，賣$18完全對得住個價。
而且仲超入味，食咗唔會涸喉；另外魚蛋同豬皮雖然唔係主角，但同樣唔失禮。
第二樣值得介紹，就係鮮榨甘筍汁，只賣$16一杯（依家外面嗰啲新鮮果汁，一杯都賣廿幾蚊）。
甘筍雪凍再拎出嚟榨汁，絕對冇渣唔腥，好creamy好smooth，完全冇溝水，飲落去冰涼又fresh又甜！除非你唔鍾意甘筍，否則冇可能話唔好飲。
但係佢哋唔識貨，都係揀番甜筒食。
我想請問一下，係咪所有男仔咁大個都仲係食到一面都係。
管理員叔叔仲同佢哋講好多歷史，同埋教佢哋點玩竹（膠）蜻蜓。
之後佢哋兩個繼續玩唔停，匿埋喺舊石度玩捉依因，對小朋友來說真係邊度都可以玩一餐，其實我哋有陣時又真係唔駛刻意安排太多節目俾佢哋。剩係呢棵樹垂下來的根，兩個鬥跳得高去掂，已經可以玩好耐……（真可愛！）夜晚落埋去九龍城廣場食晚飯，真係大滿足。
想跟我去體驗其他活動，快啲報名親子團，同埋留意專頁公佈詳情啦！
http://goo.gl/forms/CNZMEPoMIWkouK8o2
呀劍評分:10分
呀劍評語:來過賈炳達道公園好多次，今次第一次租單車踩，條單車徑真係幾激架！幾個亡命斜同亡命彎，衝落去都好有速度感。再去埋九龍寨城公園的小食亭，食蘿蔔飲甘筍汁，真係Perfect。
(以上資料更新至文章當日)
Facebook專頁:
Blog網誌 : www.kimfamilytravel.com
作者：呀劍萬帥
其他文章：