小朋友期待已久嘅暑假，終於來臨喇！一個學年勤奮過後，放暑假梗係盡情吃喝玩樂啦！唔知大家為小朋友安排好活動未呢？唔講真係唔知！成日以為「大樹先生的家」只適合7歲以下嘅小朋友，但係今年「大樹先生的家」所舉辦嘅夏令營原來7-10歲都參加得喎！上星期，我哋就係參加6-10歲呢個大group。除咗6歲嘅晴晴外，我見仲有8、9歲嘅小朋友參加。晴晴同啲大啲嘅小朋友一齊玩都玩得好開心呀！上完堂之後仲一齊去波波池同遊戲區度玩添！平時呢度係好少會見到超過7歲嘅小朋友加嘛！今次因為夏令營嘅關係，7歲以上嘅小朋友都可以入去玩呀！
「大樹先生的家 – 暑假繽FUN夏令營」包括有足球班、LEGO班、瑜伽班、魔術班同甜品班，而家就等我哋為大家實地報導一下啦！
我是小小足球運動員
要成為運動員，反應一定要夠！成班小朋友未warm up已經表現得好踴躍投入喇！果然有運動員潛質~
教練陳sir先安排一啲熱身畀佢哋，跑圈、跳步、大字形跳、單腳跳……似乎通通都難唔到佢哋喎！
跟住就一人一足球，親身感受一下踢足球嘅感覺，小朋友都顯得好興奮呀！
晴晴響電視睇過幾場世界盃，好似學到少少姿勢咁喎！
熟習咗個足球之後，就正式練習喇！先嚟帶波繞過雪糕筒，技巧係唔可以太快，要先練習控制好個波~
然後就到互相練習，對手嚟梗就要識得帶波避開~
練習完後，齊集埋一齊預備拉筋喇！
陳sir請咗幾位小朋友出嚟做示範，一齊做唔同拉筋嘅動作，大家都好認真喎！
課堂完畢！個個都可獲頒證書一張，好開心！
陳sir係前香港足球代表隊隊長嚟！仲帶埋囝囝嚟做助教，好有heart呀！
課堂後，除咗證書，仲有茶點食，一次過滿足晒三個願望啦！
近期世界盃狂熱，晴晴都變成咗球迷呀！能夠親身接觸踢足球嘅機會，實在太好喇！晴晴話好好玩、好刺激、都有難度，原來足球唔係咁易控制。仲話陳sir好友善，助教Andy哥哥亦都好幫得手！計我話佢哋唔只好人，仲好靚仔添喎！下堂再一齊玩過先得呀！