| 日期 | 全年適用 |
暑假旅遊旺季就快到，宜蘭係其中一個港人熱門親子遊之選。田媽自Justin出世已經好想帶佢去宜蘭，其中一個原因當然係宜蘭最受歡迎的車車酒店啦！
終於俾我等到佢識揸電動車，我就帶佢去咗一個5日4夜宜蘭台北包車遊。原來宜蘭除咗好啱親子遊，亦係一個可以令大人放慢腳步、放鬆心情的地方，果然不負「台北後花園」之稱。
宜蘭可供選擇的親子景點繁多，計劃行程時真係會睇到花多眼亂，但係時間有限，總希望唔會去咗有「伏味」的地方。今次田媽就主力同大家分享一下我的行程編排、同有邊個係值得去的親子景點同餐廳。
第一日冇乜特別，我哋到達桃園機場已經中午，就直接包車到宜蘭民宿，大概3點左右到達民宿。因為考慮到小朋友周車勞頓咁耐都會攰，所以下午都留喺民宿玩、游下水咁（由於田媽離開台灣後先發現今次住間民宿係無牌照的，所以恕我今次唔可以話俾大家知我哋住邊間）。
晚餐我訂咗蘭城晶英酒店紅樓的櫻桃鴨。其實我哋過兩日都會住晶英酒店，但係週末去食就限定一定要點5人餐。由於朋友們話我知佢正常的「一鴨五食」（相等於2-3人份量）已經飽到要打包，所以唯有安排閒日去食。
價錢喺台灣嚟講算貴，不過真係物有所值！
個鴨壽司超正，可惜田媽只係食咗一舊，其餘落晒人仔個肚。
我哋打破咗朋友間的紀錄：唔駛打包走！一家的食量突然好驚人，田爸連湯渣都唔放過。
食完我哋就麻煩酒店幫我哋call的士返民宿。留意返宜蘭唔會好似台北咁周街都截到的士，而且宜蘭大部分地方都係鄉郊，如果當日無揸車/包車，就可能要請酒店或餐廳的職員代你call車。
宜農牧場 – 小卡車 – 甕窯雞午餐 – 蠟藝彩繪館 – 幸福轉運站/幾米公園/丟丟噹森林 – 大碗公滑梯 – 掌上明珠晚餐
一起身個景就係一大片稻田，仲想點？
喺民宿食飽飽早餐，就出發一日遊，首站係宜農牧場。
裡面有baby豬、羊、鸚鵡、雞等等，小朋友都可以好近距離咁餵佢哋食野，除咗好熱之外，都係值得一去的地方。
農場隔離有小卡車玩，速度都幾快。
