香港眾多酒店之中，我一直也覺得黃金海岸酒店，於安排親子住宿及活動方面，都非常專業及出色，所以一到暑假，我們這一家又出發到黃金海岸玩番晚，今年仲夥拍B.Duck推出臨海假期Seaside Vacation。
真係邊度都係鴨，由踏入酒店門口到Check-in，都已經遍佈B.Duck在每一個角落。
兩個一入到間主題客房就已經發哂癲，跳上張床度要攬住隻鴨。
一諗起今晚可以瞓喺張咁靚嘅床上面真係開心。
一直打咭打唔停…
打完正面仲要打側面，因為知道一放低相機，張床同被舖就會不似人形。
（需要可以叫Room Service執番好，但係都唔想隨便要麻煩人。）
先同大家講咗樣好重要嘅嘢，就係依家訂房有早鳥優惠：
「現凡於2018年7月15日或之前預訂，並於2018年6月29日至7月31日期間入住，可享HK$200折扣優惠。」
講真…同一家入住一晚真係好開心。(忍唔住又要講多次)
入住就會即刻送你呢個輕便旅行袋，因為真係超方便，所以我哋呢兩日一夜喺酒店出出入入都帶住佢。
真係唔好意思，因為間房真係好靚好舒服，我甚少走出去海景露台(除咗出去晾毛巾之外)。
每個入住家庭仲會獲發呢張1日遊樂證（1-Day Pass），好緊要喔…因為玩咩都要靠佢㗎！。
我哋先到「B.Duck護照套DIY工作坊」，做番個專屬自己的護照套。
當然所有材料都是現成的。
小朋友先幫忙用針線將證件套聯起來。
再將B.Duck的眼耳口鼻貼在套上，可以鼓勵佢哋有自己設計，唔一定要跟足原裝版本㗎！
哥哥就按着B.Duck樣整得靚靚，妹妹反而好有創意，將兩滴水點放喺B.Duck個鼻度話佢流緊鼻水。
大功告成！
另一個「B.Duck蛋糕製作坊」係俾連續入住兩晚的小朋友參加。
蛋糕底同其他材料準備好哂。
哥哥同芊芊先幫個蛋糕搽上Cream。
重要環節就係要放佢哋最鍾意嘅彩色糖粒。
其實蛋糕有點難做，不過見到佢哋兩個做得咁開心，蛋糕做成點都冇所謂啦！
開始要做B.Duck的圖樣啦！
係咪似模似樣呢？因為有靚姐姐出手相助啫。
玩完工作坊撞啱今次主角B.Duck喺酒店大堂同大家打咭！
依家望住張相先發覺其實唔駛用真人扮都得，所以我有拍片有動感得多。
妹妹呢個動作係咩事呢？蛇形刁手？
好嗱！好嗱！終於嚟到戲肉，兩個即刻番房換好泳衣落去玩水。
未到酒店前一晚，就已經成日提住要嚟玩水，因為佢哋記得上年暑假嚟玩呢個大花灑，仲鍾意企係下面等水滿兜頭淋落嚟。
就是喜歡這種感覺！一個字「爽」。
然後到戶外水上遊戲玩個夠，記住要帶番頭先嗰張 1-Day Pass。
我哋先嚟玩呢個「B.Duck水上滾筒」每節時限8分鐘，3-11歲身高超過80厘米先可以玩㗎！
呢個大滾筒加上酒店背景就影得幾靚喎。（自己讚自己）
雖然3歲就可以玩，不過我都係建議佢自己一個入去，或者加多個差不多年紀的小朋友入去玩，如果年紀相差太遠，可能比較危險喔！
睇住佢哋超好玩耶！
兩個喺裡面碌到攰，雖然未夠鐘，但係都要喺滾筒裏面抖一抖。
再來下一個「B.Duck浮板挑戰」，同樣的年齡身高限制，呢個場除咗俾小朋友喺度坐下浮板玩下水外，最正係一個可以用嚟打咭的場景。
唔好睇佢哋好似好輕鬆咁坐喺塊浮板上面，其實佢哋兩個都坐到就跌就跌。
話口未完…
有個暖男話要幫呀妹撳住個墊！哈哈～
呢個女有得玩水就最開心！
就係呢個位啦！大家去到不妨將所有B.Duck墊堆在一起打張咭，不過也有點難度。
再到下一區「夏日遊船樂」。
起初以為都係一般划船仔，點知又睇唔出佢居然迎合番世界盃，加多個波同充氣龍門，變咗個水上足球！
次次都係呀哥拎到個波，攪到芊芊都發脾四！
跟住到「B.Duck滑水梯」，又係無限滑無限Loop嘅時侯。（今次限制有少少唔同，係要5-11歲同埋要有100cm高。）
一大隻B.Duck滑梯好莊觀呀！
上下各一位職員維持住秩序及安全，家長可以放心俾小朋友喪玩。
見住佢哋玩到咁開心，我有份企冇份玩乜都值得。（帶點怨氣說的）
最後一區係「B.Duck淘淘樂」，小水池中有黃色及粉紅色B.Duck，小朋友鬥快用網撈得多就贏。
好嚴呀，只要唔小心跌一隻就要成筒倒番落海由頭嚟過。
芊芊雖然唔開心，但係冇放棄再嚟過。
呢D時侯呀爸呀媽唔好出手呀，俾小朋友經歷一下挫敗，
同埋俾隔離嘅人揶揄一番，都係一件好事。
真係瞓得好瞓得舒服就算早起身都可以好精神，慢條斯理唔駛匆匆忙忙咁落嚟食早餐。
今次B.Duck主題仲有一個靚靚打咭景點在餐廳外面，大家唔好唔記得咗去呀！
臨離開前當然要到鯊魚館放一放電，佢哋兩個最掛住就係呢個兒童遊戲室。
雖然嚟過咁多次，但係佢哋仍然咁鍾意呢度，一啲都玩唔厭。
呢度好多地方俾家長坐埋一邊休息，絕對係一個小朋友放電大人叉電的好去處。
呀芊扮起米芝蓮人。
絕對配合劇情需要的一個小妹。
如果大家Check-out仲可以過埋去黃金海岸商場那邊打咭行街食Lunch喔！
入住的客人可以免費索取穿梭巴士票，直接出番去青衣或尖沙咀。(記住先留意班次)
就連穿梭巴士都係B.Duck呀…可以話幫成個旅程劃個完美句號呀！（呢句寫完都覺得老土）
Photo by CANON 5D Mark IV, Len | EF16-35mm f/2.8L USM
想跟我去體驗其他活動，快D報名親子團，同埋留意專頁公佈詳情啦！
http://goo.gl/forms/CNZMEPoMIWkouK8o2
呀劍評語：第5次到黃金海岸酒店玩，已經同好多姐姐們及經理同事好好感情，實在要讚一讚佢哋服務態度一流，令喺度住的每位客人都可以玩得好盡情及開心，好多謝你哋呀，錫晒你哋！
黃金海岸酒店 B.Duck 臨海假期簡介：香港黃金海岸酒店更為大家精心準備「B.Duck 臨海假期」住宿計劃，入住豪華海景客房之餘，更可享用多項充氣水上遊戲及參與「B.Duck護照套DIY工作坊」，每次入住均獲得獨家設計B.Duck輕便旅行袋乙個，晩間更特設合家歡電影觀賞活動，而星期五及日晚上則設攤位遊戲，一連串精彩活動，不容錯過！
地址：屯門青山公路青山灣段 1 號
鯊魚冒險島遊樂場開放時間：10am至10pm(每節50分鐘)
收費：酒店住客: HK$100 / 50分鐘 、非酒店住客: HK$150 / 50分鐘
* 以上收費為一位成人及一位小童 *
凡預訂於「酒店優惠」網頁內所列出的住宿計劃，可免費暢玩乙節 兒童小火車
開放時間：9am至12nn 及 2pm至6pm（來回大約10分鐘）
收費：酒店住客每次$40、非酒店住客每次$60
至Kids遊樂園
開放時間：9am至6pm
免費
*詳情請參閱主題客房計劃內容或遊覽以下網址:
使用設施前，需向職員預先登記
電話：2452 8888
網址：https://www.sino-hotels.com/hk/gold-coast/
(以上資料更新至文章當日)
