【傑。斯與晴】小JM愛玩樂。反轉澳門。Planet J 冒險王國初體驗
話說，以前小JM媽都係一名「宅女」，閒時假日都愛宅在家中，為嘅都只係想爭取多啲時間去煲劇同打機。講到打機我就最鍾意玩RPG遊戲，因為呢系列遊戲可以喺遊戲世界中化身成一位人物角色，再透過訓練、等級提升、發展劇情和過關冒險等方式去完成遊戲，每當「過關」或「打爆機」時都額外興奮。
而今次我地一行五人嘅澳門之旅終極任務就係「反轉Planet J Macau」！
VIDEO:
Planet J 冒險王國 小簡介:
座落於金沙城中心3樓嘅冒險王國喺2017年暑假正式開幕，佔地約9,300平方米，由九個唔同主題園區組成，擁有超過200種互動遊戲，包括AR及VR遊戲等。
Planet J冒險王國有別於一般傳統主題樂園，喺冒險王國呢度可以俾機會大家一齊參與冒險遊戲嘅創作及發展故事，單係呢一點已經甚為吸引。
入場後我地一行人就去櫃台準備領取【魔導卷】及了解點用!
有魔導卷我地先至可以開始我地嘅冒險之旅架！而魔導卷亦會引領我地喺魔石王國內進行唔同嘅任務。
同時亦會記錄遊戲進度，即使未玩晒下次再玩亦可以繼續。
魔導卷一共有四種不同語言，分別係：廣東話、普通話、英文及韓文。
而每部嘅魔導卷可以使用一小時架！
領取咗魔導卷之後我地就跟隨工作人員指示一同前往「皇宮」！
喺去皇宮嘅路上大家依然有講有笑，或是大家都未意識到前路會遇上嘅挑戰啦！
