| 日期 | 全年適用 |
五月嘅天氣已經好炎熱，今日揀咗去園藝農場 ，唔係去睇羊咩咩，更唔係去參觀導賞，無任何工作坊，完全係想搵個地方俾小朋友聚腳玩，近海灘而且有樹蔭大草坪，自成一角，玩乜都得，仲可以玩水槍，消暑涼透心。
咁有咩好玩呢？就好似學校旅行一樣，帶野餐自選活動，我哋就玩兒時玩意，唔同年代嘅小朋友都有唔同嘅玩意，將爸爸媽媽以前細個鍾意玩嘅嘢，同小朋友一齊去分享。
未玩之前，大家一見到個海灘已經自動波落水，非康文署管理沙灘，所以係冇救生員，亦冇得沖身，都算水清沙幼，不過就有好多貝殼海産，著住潛水鞋比較安全。
泳灘裏面有好多魚仔及海洋生物，當潮退嘅時候，我哋仲見到魔鬼魚同海星，小朋友非常開心可以近距離，認識平時只可以係隔住玻璃見到嘅海洋生物，當然我哋參觀完亦將佢哋回歸大自然。